Վաղը՝ փետրվարի 18-ին Հայաստանի Հանրապետությունում տեղի կունենան ՀՀ նախագահի ընտրությունները, իսկ մինչ այդ՝ այսօր «լռության» օր է:
Ըստ ընտրական օրենսգրքի 4-րդ գլխի 18-րդ հոդվածի 5-րդ կետի ընտրությունների քվեարկության և նրան նախորդող օրը նախընտրական ցանկացած քարոզչություն արգելվում է: Սակայն ըստ միևնույն կետի՝ տեղամասային կենտրոնում չգտնվող քարոզչական նյութերը քվեարկության օրը մնում են իրենց տեղերում:
ՀՀ նախագահի այս ընտրությունները 1991թ.-ից ի վեր 6-րդն են:
Թեև նախապես որպես նախագահի թեկնածու էին գրանցվել 8 թեկնածուներ, սակայն նրանցից մեկը՝ «Ազգային համաձայնություն» կուսակցության ղեկավար Արամ Հարությունյանը փետրվարի 8-ին ինքնաբացարկ ներկայացրեց:
Այսպիսով քվեաթերթիկի վրա նշված կլինի 7 թեկնածուի անուն՝ ՀՀ գործող նախագահ Սերժ Սարգսյան, «Ժառանգություն» կուսակցության նախագահ Րաֆֆի Հովհաննիսյան, «Ազատություն» կուսակցության նախագահ Հրանտ Բագրատյան, ԱԻՄ ղեկավար Պարույր Հարիկյան, էպոսագետ Վարդան Սեդրակյան, քաղաքագետ Արման Մելիքյան, «Ռադիո Հայ» ՍՊԸ հիմնադիրների ժողովի նախագահ Անդրիաս Ղուկասյան:
ՀՀ ոստիկանությունը հրապարակել է ՀՀ ընտրողների ռեգիստրում ընդգրկված ընտրողների ընդհանուր թիվը, որը այսօրվա՝ փետրվարի 17-ի դրությամբ կազմում է՝ 2.505.980։ Իսկ ընդհանուր ընտրողներից այլ համայնքի հաշվառում ունեցող, ըստ հաշվառման վայրի ընտրողների ցուցակից ժամանակավորապես հանված և ըստ քվեարկելու օրը գտնվելու վայրի ընտրական տեղամասի ընտրողների լրացուցիչ ցուցակ ընդգրկված են 135 քաղաքացի։
No comments:
Post a Comment