Երեկ էջմիածնի Սուրբ Գայանե եկեղեցում տե­ղի է ունեցել Սերժ Սարգսյանի չորրորդ թոռան՝ Ռիտայի մկրտության արարողությու­նը:

 Այս մասին գրում է «Հրապարակ» օրաթերթն ու հիշեցնում, որ Ս. Սարգսյանի կրտսեր դուստրը՝ Սաթենիկը, ամուսնացած է ՍԴ նախագահ Գագիկ Հարությունյանի զարմիկի հետ:

 Գ. Հարությունյանը եղել է նաև նրանց հարսանյաց, ինչպես նաև երեկ տեղի ունե­ցած մկրտության կնքահայրը: Մկրտության արարողությունից հետո իշխանական էլիտան այնուհետև հավաքվել է «Հարսնաքար» ռեստորանային համալիրում:

Սերժ Սարգսյանը հայտնվել է անելանելի իրավիճակում: Եվրոպական սիրախաղերի անսպասելի ընդհատումը, ԵԽԽՎ-ի հետ հարաբերությունների սրումը՝ Զարուհի Փոստանջյանին պատվիրակության կազմից հեռացնելու ֆոնին, տնտեսության այն աստիճանի գահավիժումը, որ վարչապետի հրաժարականի մասին խոսակցությունները շրջանառության մեջ են դրվում արդեն իշխանական շրջանակներից, Մաքսային միության անդամ երկրների՝ արդեն ցինիզմի հասնող մերժողական վերաբերմունքը Հայաստանի նկատմամբ՝ գործող նախագահին մղել են քաղաքական դաշտի այնպիսի անկլավային իրավիճակի, որտեղից ելքը որևէ կերպ չի երևում:

Անհրաժեշտ է ընդգծել մի քանի գործոններ, որոնք Սերժ Սարգսյանին մղեցին միջազգային քաղաքական գործընթացների լուսանցք՝ դրանից բխող բոլոր հետևանքներով:

Չհաշվարկված քայլերի արդյունքում վտանգի տակ է ԵԽԽՎ-ի հետ Հայաստանի՝ արդեն իսկ շատ փխրուն հարաբերությունները: Փոստանջյանի հնչեցրած հայտնի հարցն ընդամենը մեկ փոքրիկ հայտարարության թեմա էր. իշխանությունները պարզապես կարող էին հայտարարել, որ հարգում են ցանկացած ՀՀ քաղաքացու ազատ արտահայտվելու իրավունքը, սակայն կոչ են անում միջազգային ամբիոններից կարծիքներ հնչեցնելիս լինել առավել կոռեկտ և դուրս չգալ էթիկայի սահմաններից: Սրանով Հայաստանի վարկանիշն էականորեն կբարձրանար, եվրոպական կառույցների հետ այդքան բաղձալի համագործակցությունն առավել դյուրին կլիներ: Մինչդեռ ԱԺ նախագահ Հովիկ Աբրահամյանը շտապեց Փոստանջյանին հեռացնել պատվիրակության կազմից՝ փակելով Եվրոպական խորհրդարանից քաղաքական աջակցություն ստանալու բոլոր հնարավորությունները:

Չնայած ՀՀ իշխանությունների գերմարդկային ճիգերին՝ Եվրոմիության հետ որևէ ձևական փաստաթուղթ ստորագրելու, Եվրոպան շարունակում է խիստ դժկամությամբ ընդունել Հայաստանի ջանքերը: Անշուշտ, իշխանություններին հաջողվեց որոշակի հալոցք մտցնել եվրոպացիների սառը սրտերում և Վիլնյուս մեկնելու խիստ անորոշ կարգավիճակ պոկել նրանցից, սակայն նրանց դիրքորոշումը հստակ է՝ Եվրոպան չի կարող Հայաստանի հետ իրական հարաբերություններ զարգացնել, քանի դեռ Մաքսային միությանը անդամակցելու գործընթացը ՀՀ արտաքին քաղաքականության գերակա ուղղությունն է:

Հայկական սփյուռքի գործոնը, անշուշտ, կստիպի, որ ԵՄ պաշտոնյաները մեր երկրի նկատմամբ որդեգրեն քաղաքակիրթ բառապաշար, սակայն այդ մեղմ հայտարարությունները կարող են որոշակի ներքին սպառման սնունդ հանդիսանալ իշխանական քարոզչամեքենայի համար, սակայն արտաքին քաղաքական հարցերում զրո արժեք ունեն: Այդ մասին Երևանում ուղղակիորեն ակնարկեց Եվրոպական արտաքին գործողությունների ծառայության՝ Ռուսաստանի, Արևելյան գործընկերության, Կենտրոնական Ասիայի, տարածաշրջանային համագործակցության և ԵԱՀԿ հարցերով տնօրեն Գունար Վիգանդը. «Մենք վճռական ենք Հայաստանի հետ շարունակել մեր խորը համագործակցությունը, բայց, իհարկե, պետք է հաշվի առնենք նաև ՄՄ-ին անդամակցելու որոշումը, որը կայացվել է վերջերս»: Սա ամենամեղմ հայտարարությունն է, որ երբևէ հնչել է Եվրոպայից, որում, սակայն, ամեն ինչ ասված է:

Ամեն ինչ հստակ չէ նաև Մաքսային միությանն անդամակցության գործընթացում: Միության հիմնադիր անդամներից Բելառուսի նախագահ Ալեքսանդր Լուկաշենկոն պնդում է, որ Հայաստանին Մաքսային միություն ընդունելու հարցի քննարկման ժամանակ անհրաժեշտ է հաշվի առնել Ադրբեջանի կարծիքը: «Հայաստանը չլուծված տարածքային հարց ունի Ադրբեջանի հետ: Ուրեմն, Ադրբեջանի կողմից հարցեր կլինեն: Որքան ես հասկանում եմ, Իլհամ Ալիևն այդ հարցը ղազախ իր գործընկերոջն արդեն տվել է: Մենք պետք է հաշվի նստենք Ադրբեջանի կարծիքի հետ: Ադրբեջանը գնում է մեր նորագույն զենքը: Ես այդպիսով ընդգծում եմ, որ Բելառուսը Ադրբեջանի հետ փակ թեմաներ չունի »,- հայտարարել է Լուկաշենկոն՝ ընդգծելով, որ թեև Բելառուսը Հայաստանի նմանությամբ ՀԱՊԿ-ի անդամ է, պաշտոնական Մինսկը Բաքվի հետ ռազմատեխնիկական համագործակցություն է զարգացնում:

Սա իսկապես սառը ցնցուղ էր Հայաստանի ղեկավարության համար: Եվրոպական սպասվելիք տնտեսական և քաղաքական պատժամիջոցների ֆոնին (որևէ մեկը հաստատ չի կասկածում, որ Եվրոպան չի թողնի, որ մենք մարսենք քառամյա անպտուղ սիրախաղերը) նմանատիպ վերաբերմունքը այն գործընկերոջ կողմից, հանուն որի հետ հարաբերությունների խորացման երկիրը գնում է նման արկածախնդրության՝ անդառնալի հարված է արտաքին քաղաքական ճակատում: Իսկ այդ հարվածին հաջորդեց ևս մեկը՝ գոտկատեղից ներքև, Բելառուսը պարզապես քարոզչական հարված հասցրեց Սերժ Սարգսյանին՝ փորձելով քարոզչական դաշտում ոչնչացնել նրա հեղինակությանը:

Ինչպես գիտեք՝ հոկտեմբերի 25-ին Սերժ Սարգսյանը Բելառուս կատարած աշխատանքային այցի շրջանակներում Մինսկում մասնակցել է ԱՊՀ անդամ պետությունների ղեկավարների խորհրդի նեղ, այնուհետև ընդլայնված կազմով նիստերին: Բելառուսական ОНТ հեռուստաալիքը տարածել է այդ նիստի մասին պատմող մի տեսանյութ, որտեղ հստակ երևում է, թե ինչպես է Սերժ Սարգսյանը քնել կլոր սեղանի մոտ: Հայկական կողմը հանդես եկավ կցկտուր հերքումներով, սակայն չհրապարակվեց որևէ տեսագրություն, որը կապացուցեր հակառակը: Ի վերջո, այդ կարգի հանդիպումները լուսաբանում են տասնյակ հեռուստաալիքներ, որոնք կարող էին ներկայացնել այլ, Սերժ Սարգսյանի քնած լինելը հերքող տեսագրություն: Այստեղ, սակայն, էականը այն չէ՝ Սերժ Սարգսյանը ի վերջո նիրհե՞լ է, թե համակ ուշադրությամբ, փակ աչքերով վայելել է Լուկաշենկոյի մտքի գոհարները: Էականն այն է, որ դուրս գալով կոռեկտության սահմաններից՝ բելառուսական կողմը քարոզչական դաշտ է նետել մի խայծ, որը օգտագործվելու է Մաքսային եղբոր դեմ: Նման հրապարակումները երբեք չեն կարող պատահական լինել, հետևաբար Բելառուսը պարզապես հասկացրել է, որ ոչ մի կերպ չի մեղմացրել իր դիրքորոշումը՝ Հայաստանի՝ Մաքսային միությանն անդամակցության կապակցությամբ: Սա մի իրավիճակ է, որ Հայաստանին մղում է անելանելի, քաոսային միջազգային հարաբերությունների ոլորտ:

Խնդիրը ավելի է խորանում այն պարագայում, երբ իշխանության հնարավոր ժառանգորդների թվում ընդգծված լուրջ և վստահելի ֆիգուրներ գոյություն չունեն: Տիգրան Սարգսյանը, որը հայտնի է իր՝ Մաքսային միությանն անդամակցելուն դեմ ելույթներով, այժմ որքան էլ պնդի հակառակը, Ռուսաստանի կողմից այլևս չի ընկալվում որպես վստահելի քաղաքական ֆիգուր, իսկ Հովիկ Աբրահամյանը, որը արտաքին աշխարհին հայտնի է բացառապես որպես տնտեսական լուրջ կարողություններով օժտված, բայց քաղաքական առաջնորդի հատկանիշներից զուրկ գործիչ, որի պոտենցիալը՝ երկիրը և հասարակական զանգվածներին կառավարելու հարցում, կասկածելի է և որպես նախագահի հնարավոր անցողիկ թեկնածու՝ լուրջ չի ընկալվում միջազգային հանրության կողմից: Գործող իշխանությունից դուրս նախագահական հավակնություններ ունեցողներ, անշուշտ, կան, բայց քանի դեռ նրանց հնարավորությունները ասպարեզում չեն ուրվագծվում՝ այս պահին նրանք խաղից դուրս են և որպես այս կամ այն արտաքին ուժի հենարաններ կարող են դիտարկվել բացառապես չորս տարի անց: Այս դեպքում արդեն խոշոր խաղացողները վերապահումներով են մոտենում այժմ Հայաստանի հետ որևէ լուրջ գործարքի կնքումը, որքան էլ այստեղից կուրծք ծեծեն, որ ՄՄ անդամակցությունը Հայաստանի համար այլընտրանք չունի:

Քանի որ Սերժ Սարգսյանի արտաքին քաղաքական վերջին դեգերումները լուրջ հարցականի տակ են դրել Հայաստանի մասնակցությունը միջազգային ալյանսներից որևէ մեկին՝ նրա՝ հեռացող նախագահ լինելու ֆոնին Ռուսաստանը դեռևս չի տեսնում այն քաղաքական գործչին, որի վրա կարող է հենվել Հայաստանում: Հենց այդ է պատճառը, որ Մոսկվան առանձնապես չի զսպում ղազախական և բելառուսական կողմերից հաճախակի հնչող հայտարարությունները, որոնք կասկածի տակ են դնում Հայաստանի անդամակցությունը Մաքսային միությանը: Սերժ Սարգսյանը շուտով հեռանալու է, իսկ նրա աճեցրած գործիչները վաղուց ապացուցել են իրենց՝ քաղաքականությունից կիլոմետրերով հեռու լինելը:

Ներքին ճակատում ևս ամեն ինչ Սերժ Սարգսյանի դեմ է: Երկրի սոցիալ – տնտեսական իրավիճակը շարունակում է աղետալի ձևախեղումների ենթարկվել: Չկարողանալով հավասարակշռել գնաճն ու աշխատավարձերի բարձրացումը՝ վարչապետ Տիգրան Սարգսյանը պարզապես փաստի առաջ է կանգնեցրել երկրի ազգաբնակչությանը: Այս համատեքստում ուշագրավ հայտարարություն է արել ԱԺ փոխնախագահ, ՀՀԿ խոսնակ Էդուարդ Շարմազանովը: Նա չի բացառել կառավարության հրաժարականը' նշելով, որ դա ապագայի հարց է, իսկ հիմա իրենք աշխատում են իրավիճակը շտկելու համար. «Իշխանության այն ներկայացուցիչը, որը բավարարված է երկրում աղքատության 35% մակարդակից, կարող է փասա-փուսեն հավաքի, գնա այս երկրից»: Հավելենք, որ նմանատիպ հայտարարություն իշխանության նման բարձր մակարդակով երբևէ չէր հնչել: Մենք արդեն մի իրավիճակում ենք, որ կառավարության հրապարակած ճռճռան թվերն անգամ երկրի իշխանության բարձր օղակներին չեն համոզում:

Այս բոլոր գործոնները Սերժ Սարգսյանի իշխանավարության հետագա տարիների համար հուշում են մղձավանջային սցենարներ: Ամեն ինչ առավել անհույս կլինի, երբ քաղաքական տարաբնույթ ուժային կենտրոնները իշխանության ներսում կսկսեն գզվռտոց՝ ապագայում Սերժ Սարգսյանի աթոռը ժառանգելու համար: Եվրոպայի կողմից ակնկալվող շուրջ մեկուկես միլիարդ դոլար ստանալու հնարավորությունը կորցնելուց, Մաքսային միության՝ արդեն անորոշ և ոչինչ չխոստացող անդամակցության պարագայում առաջացել է տնտեսության վերջնական պարալիզացման վտանգ, որովհետև Հայաստանի տնտեսությունը այլևս ի վիճակի չէ սպասարկելու երկրի կարիքները, վարկերն ու պարտքերը տարեցտարի բառացիորեն խեղդում են և արտաքին պարտքերի սպասարկումը գրեթե անհնար է դարձել, իսկ գործարար հատվածի մասսայական արտագաղթը երկրից պարզապես սպառում է հարկահավաքությամբ աշխատավարձերը բարձրացնելու և գնաճը զսպելու վերջին հնարավորությունները:

Այս պարագայում Սերժ Սարգսյանը կամ պետք է մնա Անգլիայի թագուհու կարգավիճակում՝ համակերպվելով այն մտքի հետ, որ այլևս չի վերահսկում արտաքին քաղաքական և ներքին տնտեսական հոսքերը՝ երկիրը մղելով անդառնալի քաոսի մեջ, կամ պետք է հայտարարի, որ իր որդեգրած կուրսը ձախողվել է և ինքը հրաժարական է տալիս:

Սերժ Սարգսյանը մեկ այլ շանս ունի, որը իրագործելու համար իր ձեռքը պետք է վերցնի հեղափոխականի դրոշը և պայքար սկսի իր և Քոչարյանի օրոք հաստատված համակարգի դեմ: Հարկավոր է օր առաջ ցրել Ազգային ժողովը, երաշխավորել ազատ և արդար ընտրությունների անցկացումը, փոխել կառավարությունը, հանրաքվեով որոշել երկրի արտաքին քաղաքական կուրսը, կատարել բարեփոխումներ, որոնք ցավոտ հարվածներ կհասցնեն հենց իր շրջապատին և հեռանալ որպես մի մարդ, որը օգտվել է պատմության և ժողովրդի առաջ գործած մեղքերի գոնե մի մասը սրբագրելու հնարավորությունից և երկիրը հետ է քաշել արկածախնդրության ճանապարհից:

Նա պետք է վճռականություն ունենա, որովհետև արտաքին քաղաքական և ներքին ճակատներում նմանատիպ ուժգին հարվածներից հետո, արմատական լուծումների չգնալու դեպքում, նրան մի քանի ամսվա կառավարման ռեսուրս է մնացել: Եթե իր մերձավորները նրան այդ մասին դեռևս չեն հուշել, ուրեմն պալատական վերնախավը պարզապես օգտվում է իրավիճակից՝ «Ժառանգորդ» օպերացիան երկրի ավերակների վրա կազմակերպելու համար:

Սերժ Սարգսյանը ունի երկու ճանապարհ՝ իր ձեռքով արմատախիլ անել չորսբոլորը վխտացող առնետներով լեցուն համակարգը՝ ցուցաբերելով հարգանք սեփական ժողովրդի նկատմամբ, կամ հրաժարական տալ: Երկու դեպքում էլ ժողովուրդը շնորհակալ կլինի նրանից:

ՀԱՕԿ գլխավոր քարտուղար Հրաչյա Ռոստոմյանը Facebook-ի իր էջում գրել է.

«Ամիսներ առաջ Հայաստանի ֆուտբոլի ֆեդերացիայի նախագահ Ռուբեն Հայրապետյանը հրաժարական տալու մտադրություն հայտնեց: Կարծում եմ, որ ճիշտ որոշում էր, քանի որ այն ինչ վերջին տարիներին կատարվում է հայկական ֆուտբոլում` ավելի քան մտահոգիչ է:

Եթե մի կողմ դնենք ազգային հավաքականի հարաբերական հաջողությունը, ապա մյուս բոլոր ոլորտներում հայկական ֆուտբոլը տապալվում է: Իսկ ազգային հավաքականի որոշակի հաջողությունները ոչ թե հայկական ֆուտբոլի, այլ ֆրանսիական, ամերիկյան, ռուսական և հոլանդական ֆուտբոլի դպրոցների հաջողություններն են: Չմոռանանք, թե որտեղ են ֆուտբոլիստներ դարձել Օզբիլիսը, Մովսիսյանը, Սարկիսովը, Մխիթարյանը…

Մանկապատանեկան ֆուտբոլի վիճակը շատ լավ ցույց է տալիս, թե իրականում ինչպես է աշխատում Հայաստանի ֆուտբոլի ֆեդերացիան: Երևանի մեկ-երկու ֆուտբոլային դպրոցները հանած, մարզերում ֆուտբոլը պարզապես մեռած է: Իսկ պատանեկան, երիտասարդական հավաքականների մեղմ ասած անմխիթար վիճակը, ոչ մի լավատեսական հույս չի ներշնչում: Եվ այս խնդիրներով մտահոգվելու և սեփական աչքի գերանը նկատելու փոխարեն ՀՖՖ նախագահը լծվել է այլոց քայլերին գնահատականներ տալուն:

Ինչ վերաբերում է Ավանի ֆուտբոլի ակադեմիային, ապա բոլորն էլ գիտեն, թե ում փողերով և ջանքերով է այն իրականություն դարձել:

Մեր ֆուտբոլում այնպիսի վիճակ է, որ մրցավարները միջազգային խաղ սպասարկելուց հանցագործություն են անում և հայտնվում բանտում: Սա է հայկական ֆուտբոլի իրական դեմքը: Մենք միջազգային ասպարեզում պարզապես խայտառակ ենք լինում:

Մենք խայտառակ եղանք, երբ նույնիսկ արտասահմանյան լրատվամիջոցները գրեցին, որ ՀՖՖ նախագահը ծեծել է հավաքականի բժշկին: Կամ ինչի նման է, երբ բոլորի աչքի առաջ ՀՖՖ նախագահը բռնում է մարզական լրագրողի կոկորդից կամ ռազբորկայի հրավիրում ակումբներից մեկի ղեկավարներին:

Ֆուտբոլի ֆեդերացիայի աշխատանքի մասին է վկայում նաև այն, ինչ տեղի ունեցավ Հայաստան-Չեխիա հանդիպումից առաջ, երբ հազարավոր ֆուտբոլասերներ տոմսերը ձեռքներին մնացին մարզադաշտի պատերի տակ: Մինչև այսօր էլ չբացահայտվեց, թե ով կամ ովքեր էին մի տեղի համար երկու տոմս վաճառել:

Ֆուտբոլի ֆեդերացիան մատը մատին չի խփել նաև ակումբային ֆուտբոլի կայացման հարցում: Այսօր հենց Ռուբեն Հայրապետյանն է խոստովանում, որ բացի մի քանի ակումբներից, մյուսները ֆինանսական խնդիրներ ունեն: Իսկ եթե օրինակներով խոսելու լինեմ, ապա պետք է փաստեմ, որ օրինակ «Փյունիկ»-ը եվրոպական ֆուտբոլային ակումբների աղյուսակի 5-երորդ հարյուրյակի սանդղակում է գտնվում:

Իսկ երբ ՀՖՖ նախագահը հայտարարում է, որ մենք անելիք չունենք կանանց ֆուտբոլում, ապա սա արդեն ավելի քան մտահոգիչ է: Նույնն է, թե Ծանրամարտի ֆեդերացիայի նախագահը հայտարարի, թե մենք կանանց ծանրամարտում անելիք չունենք, քանի որ դա հարիր չէ հայ կնոջը: Իրոք, որ իրավիճակը ֆուտբոլում մտահոգիչ է:

Մտոհոգում է նաև, որ մարզական ֆեդերացիաներից մեկի նախագահին չի մտահոգում Վոլեյբոլի ֆեդերացիայում տեղի ունեցած խայտառակությունը: Ավելին, անգամ Ռուբեն Հայրապետյանը փորձ է անում կանգնել անօրինակության հեղինակների կողքին:

Այս ամենից հետո, արդյոք Ռուբեն Հայրապետյանն այն մարդն է, ով պետք է գնահատականներ տա ՀԱՕԿ-ի և նրա նախագահի կատարած աշխատանքի վերաբերյալ: Կարծում եմ՝ ոչ: Այս դեպքում վստահ կարող եմ ասել, որ եթե ուրիշներին քննադատելու, ուրիշների կատարած ահռելի աշխատանքի նշանակությունը նսեմացնելուն ուղղված ջանքերն օգտագործվեին ի նպաստ հայկական ֆուտբոլի զարգացմանը, ապա միգուցե մեր հավաքականի վիճակն այսպիսին չէր լինի: Իսկ եթե անգամ այսքանից հետո որոշ մարդիկ դեռ անհանգստության խրոնիկ դրսևորումներ ունենան, ապա խորհուրդ եմ տալիս պարզապես սառը ջուր խմել, ասում են՝ օգնում է»:

ԲՀԿ խմբակցության պատգամավոր Գրիգորի Մարգարյանը (Բելաջոյի Գրիշ) հաճախ փոխում է ոչ միայն քաղաքական դաշտը` ՕԵԿ-ից ՀՀԿ, այստեղից էլ` ԲՀԿ, այլեւ`  իր անշարժ գույքը:

 2011թ.տարում պատգամավորն ունեցել էր 36 մլն 571 հազար դրամ, որից 3 մլն 121 հազար դրամը աշխատավարձն էր, իսկ մնացածը` գույքի օտարումից ստացած եկամուտը:

Գրիգորի Մարգարյանը 2011-ի սկզբին իր հաշվեհամարին ունեցել էր 2 միլիարդ 136 մլն դրամ, իսկ տարեվերջին` 2 մլրդ 91 միլիոն 500 հազար, ինչպես նաեւ 815 հազար դոլար:

Պատգամավորը տարվա ընթացքում ձեռք էր բերել 7 եւ 11.4 մլն դրամ արժողության երկու հողամաս, ինչպես նաեւ 31 մլն դրամով մեկ բնակարան եւ 2 մլն դրամով ավտոտնակ: Բացի այդ՝ նա ուներ եւս 3 շենք-շինություն:

Պարզվում է՝ 2012թ. պատգամավորն իր անշարժ գույքի մի մասը վաճառել է: Դա է վկայում նրա գույքի ու եկամուտների հայտարարագիրը: 101 մլն 980 հազար 700 դրամով վաճառել է բնակարանը, իսկ 6 մլն 243 հազար 700 դրամով` ավտոտնակը:

Պատգամավորի 2012թ. եկամուտը կազմել է 111 միլիոն 348 հազար 370 դրամ, որից 3 մլն 124 հազարը աշխատավարձն է, իսկ մնացածը` գույքի օտարումից ստացած գումարը:

Մեկ տարվա ընթացքում ավելացել է ոչ միայն եկամուտները, այլեւ դրամական միջոցները` 2012թ. սկզբի 2 միլիարդ 91 մլն 500 հազար դրամից տարեվերջին հասնելով 2 միլիարդ 237 մլն 350 հազար դրամի: Նրա հաշվին անփոփոխ է մնացել 815 հազար դոլարը:

Ստացվում է՝ բնակարան գնել-վաճառելն էլ է լավ «բիզնես», որը մեծ եկամուտներ է բերում պատգամավորին:

Արտարժույթ	2011թ.		2012թ.
	Դրամ	Եկամուտ	Դրամ	Եկամուտ
Դրամ	2.091.500.000	36.541.040	2.237.350.000	111.348.370
Դոլար	815.000	0	815.000	0

«Կելլի եւ Վիլիամս» ընկերությունում եւ շարժիչային, տրանսմիսիոն յուղերի, արգելակման հեղուկի մեծածախ եւ մանրածախ վաճառքով զբաղվող «Ինգլիշ Թրեյդ Հաուզ» ՍՊԸ-ում բաժնետեր է պետեկամուտների կոմիտեի նախագահի տեղակալ Ռոբերտ Գալոյանը, ով այդ պաշտոնը ստանձնել է 2012թ. ապրիլին: Մինչ այդ Ռ. Գալոյանը եղել է ՊԵԿ-ի օպերատիվ հետախուզության վարչության պետը:

Ուսումնասիրելով բարձրաստիճան պաշտոնատար անձի 2012թ. գույքի ու եկամուտների հայտարարագիրը՝ պարզվեց, որ նա զգալի կարողության տեր է: Մասնավորապես՝ նշված տարում Ռոբերտ Գալոյանը որպես դրամական միջոց հայտարարագրել է 44 մլն դրամ, 2 մլն 300 հազար դոլար եւ 200 հազար եվրո: 2011թ. վերջին Ռ. Գալոյանի դրամով պահվող գումարը եղել է 300 մլն դրամ:

2012թ. ՊԵԿ նախագահի տեղակալն ունեցել է 195 մլն 272 հազար 586 դրամի եկամուտ, որից 6 մլն 597 հազար 140 դրամը եղել է աշխատավարձը, 21 մլն 169 հազար 693 դրամը` 3 տարբեր բանկային ավանդներից ստացված տոկոսագումարը, 143 մլն 565 հազար 753 դրամը` 2 ընկերություններից ստացված շահաբաժինը, իսկ 23 մլն 940 հազար դրամն էլ ստացվել է վարձակալության վճարից:

ՊԵԿ նախագահի տեղակալի կինը` Գոհար Մեկիկչյանը, 2012թ. ունեցել է ընդամենը 900 հազար դրամի եկամուտ, որը գոյացել է աշխատավարձից, սակայն նրա հաշվին եղել է 29 մլն դրամ եւ 270 հազար դոլար: 2011թ. վերջին Գոհար Մեկիկչյանի դրամային գումարը եղել է 31 մլն դրամ:

Ռոբերտ Գալոյանը «Հետքի» հետ զրույցում ասաց, որ «իր հայտարարագրած գումարներն օրինական են եւ ստացված են շահաբաժիններից»: Ըստ ՊԵԿ նախագահի տեղակալի` ինքը բիզնեսով չի զբաղվում, իսկ «Կելլի եւ Վիլիամս» եւ «Ինգլիշ Թրեյդ Հաուզ» ՍՊԸ-ները տրված են հավատարմագրային կառավարման:

Ռոբերտ Գալոյանը չմանրամասնեց, թե որտեղից են գոյացել կնոջ գումարները, երբ նրա տարեկան աշխատավարձը 900 հազար դրամ է եղել: «Դրանք հնուց եկող գումարներ են, ասենք` տատիկից են փոխանցվել»,- ասաց ՊԵԿ նախագահի տեղակալը:

ՀՀ կառավարության այս տարվա  հուլիսի 4-ի 777 -Ն որոշմամբ 416 մլն 769 հազար դրամ է հատկացրել «Ա/Ճ Մ-2 Երեւան-Երասխ-Գորիս-Մեղրի-Իրանի Իսլամական հանրապետության սահման կմ 177+000-կմ 217+000 առանձին հատվածների հիմնանորոգման» աշխատանքների համար: 

Կառավարությունը որոշել է, որ հիշյալ ճանապարհահատվածի վերանորոգման աշխատանքները պետք է իրականացվի «Գնումների մասին» ՀՀ օրենքով` բանակցային ընթացակարգով, առանց գնումների հայտարարությունը նախապես հրապարակելու միջոցով:

Օգոստոսի 14-ին տրանսպորտի եւ կապի նախարարությունը պետության կարիքների համար կապալային աշխատանքների կատարման պետական գնման պայմանագիր է կնքել «Սիսիանի ԲՈՒԱՏ» ՍՊԸ-ի հետ` 409 մլն 221 հազար դրամ արժեքով: Աշխատանքները պետք է ավարտվեն այս տարվա հոկտեմբերի 12-ին:

Նշենք, որ «Սիսիանի ԲՈՒԱՏ» ՍՊԸ-ն 100 տոկոսով պատկանում է ԱԺ փոխնախագահ, ՀՀԿ անդամ Հերմինե Նաղդալյանին:

Մրցույթներ չհայտարարելով` պետության կարիքների համար պետական գնման պայմանագրերի կնքման նպատակը մեկն է՝ թույլ չտալ «անցանկալի» ընկերությունների մուտքը շուկա, ինչն էլ ենթադրում է խոշոր կապիտալի բեւեռացում իշխանությունների մերձավոր շրջապատի ձեռքում:

ԱԺ փոխնախագահին նեղ շրջապատում ասում են «բիզնես լեդի»: Նա խորհրդարանի ամենահարուստ կին պատգամավորն է: Թեեւ Հերմինե Նաղդալյանը հաճախ է հայտնվել սկանդալային պատմությունների մեջ, եւ դրա մասին մամուլը բարձրաձայնել է, սակայն իշխանությունները, այս դեպքում` կառավարությունը, չի խուսափում պետական բյուջեի հաշվին մի քանի զրոներով  ԱԺ փոխնախագահի հարստությունն ավելացնելուց:

Հերմինե Նաղդալյանը բաժնետոմսեր ու այլ ներդրումներ ունի նաեւ «Սիսիան Շիկ», «Բեգմիք», «Նազենիկ» ՍՊԸ-ներում: Իսկ 2012թ. 13 մլն դրամով օտարել է իրեն պատկանող «Ալնարս» ՍՊԸ-ն:

Հ. Նաղդալյանն ունի 5 միավոր հողամաս, 2 բնակարան, 2 շինություն եւ մեկ շենք` իրենց հողամասերով:

Հերմինե Նաղդալյանի դրամական միջոցներն ու եկամուտները` ըստ տարիների
Արժույթ		2006թ.	2009թ.	2010թ.	2011թ.	2012թ.
Դրամ	Դրամական միջոց	---	---	---	50.000.000	50.000.000
	եկամուտ	98.542.000	823.732.950	940.734.000	877.411.267	375.083.680
Դոլար	Դրամական միջոց	---	---	---	10.000	10.000
	եկամուտ	134.000	466.000	784.000	---	---

Հերմինե Նաղդալյանի ամուսինը` Դավիթ Բեգլարյանը, ըստ գույքի ու եկամուտների հայտարարագրի, 2011թ. հանձնված կամ վերադարձված փոխառություններից ստացել է 288 մլն դրամ եւ 850 հազար դոլար: Դ. Բեգլարյանի դրամական միջոցները 2011թ. վերջին կազմել են 15 մլն, իսկ աշխատավարձից ստացած եկամուտները` 3 մլն 661 հազար դրամ:

2012թ. տարեվերջին Դավիթ Բեգլարյանը հայտարարագրել է 6 մլն դրամ, որպես ունեցած դրամական միջոց եւ եկամուտ` 1 մլն 471 հազար դրամ, որը գոյացել է աշխատավարձից:

Ազգային ժողովի սոցիալական հարցերի մշտական հանձնաժողովի նախագահ, պատգամավոր Հակոբ Հակոբյանը (Թունելի Հակոբ) գրեթե միշտ քննադատում եւ բացասական եզրակացություն է տալիս ընդդիմադիր գործընկերների նախաձեռնություններին, որոնք ուղղված են նվազագույն աշխատավարձերի կամ կենսաթոշակների, նպաստների, սոցիալապես խոցելի խմբերին հատկացվող օգնությունները ավելացնելուն: Պատգամավորի պատճառաբանությունը մեկն է. պետությունը չունի ֆինանսական հնարավորություններ:

Ուսումնասիրելով Հակոբ Հակոբյանի գույքի ու եկամուտների 2012թ. հայտարարագիրը` պարզեցինք, որ պատգամավորն ամենեւին էլ ԱԺ-ից ստացած «չոր» աշխատավարձի հույսին չէ, հետեւաբար նրա համար, մեծ հաշվով, միեւնույն է` կբարձրանա նվազագույն աշխատավարձը, թե ոչ:

Նշված տարում պատգամավորն ունեցել է 125 միլիոն 650 հազար դրամի եկամուտ, որից մոտ 3 մլն 55 հազարը ԱԺ-ից ստացած աշխատավարձն է, 77 միլիոն 256 հազարը` «Արփա-Սեւան» ԲԲԸ-ից ստացած շահաբաժինը, իսկ 45 մլն 339 հազար դրամի եկամուտ` շահաբաժնի տեսքով, ապահովել է պատգամավորի մյուս ընկերությունը` «Բազենք» ՓԲԸ-ն:

«Հետքն» անդրադարձել է «Բազենք» ՓԲԸ-ի գործունեությանը: Այս ընկերությունն է շահագործում «Եղեգիս-1» ՀԷԿ-ը:

Ինչ վերաբերում է դրամական միջոցներին, Հակոբ Հակոբյանը 2012թ. տարեսկզբին ունեցել է 35 մլն 567 հազար դրամ եւ 162 հազար 188 դոլար, իսկ տարեվերջին` 42 մլն 275 հազար դրամ եւ 101 հազար դոլար:

Նշենք, որ պատգամավորն ունի նաեւ 8 անուն անշարժ գույք եւ մեկ ավտոմեքենա: «Մերսեդես Բենց E-300» մակնիշի ավտոմեքենան 20 մլն դրամով ձեռք է բերել 2011թ-ին: Ինչ վերաբերում է դրամական միջոցներին ու եկամուտներին, ապա 2011-ին` Հակոբ Հակոբյանն ունեցել է 114 մլն 683 հազար դրամի եկամուտ եւ 35 մլն 567 հազար դրամ եւ 162 հազար 188 հազար դոլարի տնտեսած դրամական միջոց:

Պատգամավորի կինը` Անահիտ Ղազարյանը, բացի աշխատավարձից այլ եկամուտ չունի: 2011-ին նրա աշխատավարձը կազմել է մոտ 509 հազար դրամ, իսկ 2012-ին` 507 հազար դրամ:

Արդարադատության նախարարության կայքում տեղադրված «Փաստաբանության մասին ՀՀ օրենքում փոփոխություններ եւ լրացումներ կատարելու մասին» եւ «Պետական տուրքի մասին ՀՀ օրենքում լրացումներ կատարելու մասին» ՀՀ օրենքների նախագծերը փաստաբանների շրջանում բուռն քննարկումների առիթ դարձան:

Հիշեցնենք, որ նախագծերով արդարադատության նախարարությանը վերապահվում է նոր լիազորություն` Փաստաբանների պալատի կողմից արտոնագրված փաստաբանից տարեկան գանձել 60.000 դրամի չափով պետական տուրք` գրանցամատյան վարելու եւ փաստաբաններին պետական գրանցամատյանում մեկ տարի ժամկետով հաշվառելու համար:

Փաստաբանները նշված պետական տուրքը համարում են «շքեղության հարկ», իսկ փաստաբանությունը` «շքեղություն»: Ոմանք առաջարկեցին «շքեղության հարկով» հարկել նաեւ կառավարության անդամներին, մանավանդ արդարադատության նախարար Հրայր Թովմասյանը չէր թաքցրել, որ նախատեսված տուրքը «բյուջե լցնելու» համար է: «Այո, ամբողջ աշխարհում էլ հարկերի միջոցով փորձում են բյուջե լցնել: Ես այստեղ որեւէ բան չեմ տեսնում»,- նախագծերի վերաբերյալ ասել էր նախարարը:

Ուսումնասիրելով արդարադատության նախարարի գույքի ու եկամուտների հայտարարագրերը՝ պարզեցինք, որ նախարարի եկամուտներն ու դրամական միջոցները թույլ են տալիս, որ նա էլ ընկնի «շքեղության հարկի» տակ:

Հրայր Թովմասյանը 2012թ. ունեցել է մոտ 7 մլն 502 հազար դրամ, որից 3 մլն 782 հազար դրամը աշխատավարձերից գոյացած գումարն է, 3 մլն դրամը ձեւակերպել է «այլ գումար», իսկ 720 հազար դրամը փոխառություն է: Բացի դրանից՝ իր հաշվին ունեցել է 70 հազար դոլար եւ 6 հազար 750 եվրո: Նշված տարվա վերջին Հրայր Թովմասյանի դրամական միջոցներին ավելացել է նաեւ 16 մլն 780 հազար դրամ:

Նախարարի կինը` Լամարա Խուդավերդյանը, 2012 թ. ունեցել է 1500 դոլարի եկամուտ, որը ստացել է ավանդի տոկոսներից: Իսկ որպես դրամական միջոց իր հաշվին ունեցել է 32 հազար դոլար:

Համեմատության համար նշենք, որ Հրայր Թովմասյանը 2011թ. 37 մլն դոլարով օտարել էր բնակարանը փոխարենը ձեռք էր բերել ավելի թանկ բնակարան` 60 մլն 532 հազար դրամ արժողությամբ: Իսկ եկամուտները եղել են նույնը` 7 մլն 502 հազար դրամ:

2014 թ-ից գործարկվում է կեսնաթոշակային նոր բազմաստիճան համակարգ, ըստ որի` 1974 թ-ից հետո ծնված ՀՀ քաղաքացիները թոշակային տարիքի անցնելուց ոչ թե թոշակ են ստանալու բաշխողական կամ սերունդների համերաշխության սկզբունքով, այլ` որքան կուտակել են աշխատանքային տարիներին: 

Ըստ նոր համակարգի` եթե աշխատավարձը չի գերազանցում 500 000 դրամը, ապա աշխատողը կուտակում է յուրաքանչյուր ամիս աշխատավարձի 5 տոկոսի չափով, նույնքան գումար էլ ապագա թոշակառուի հաշվին ուղարկում է հայրենի պետությունը: Եթե աշխատավարձը գերազանցում է 500 000 դրամը, ապա պետությունը թոշակային հաշվին փոխանցում է 25,000 դրամ, իսկ աշխատողը իր աշխատավարձի 10 տոկոսը՝ հանած 25,000 դրամը որ վճարվել է պետության կողմից: Այսինքն, մինչև 500,000 դրամ աշխատավարջի դեպքում աշխատողը և պետությունը կատարում են հավասար վճարում, իսկ 500,000-ից բարձրի դեպքում՝ աշխատողն ավելի շատ է վճարելու:

Կուտակային կենսաթոշակների համակարգը պրակտիկորեն նոր է գործարկվելու, չկան հստակ մեխանիզմնր, որոնք երաշխավորելու են արժանապատիվ ծերություն` արժանապատիվ կենսաթոշակով: Քանի որ գործընթացն երկարաժամկետ է, ապա համակարգի ներդնողների պատասխանատվության չափաբաժինը ավելի է նվազում:

Այս հարցի առնչությամբ ՀՀ Մարդու Իրավունքների Պաշտպան Կարեն Անդրեասյանին իր մտահոգությունն է հայտնել փաստաբան Հայկ Գրիգորյանը:

Փաստաբանը հանդես գալով ձևավորված քաղաքացիական նախաձեռնության անդամների և իր անունից` սկզբունքային անհամաձայնություն է հայտնել Կուտակային կենսաթոշակների մասին ՀՀ օրենքի մի շարք դրույթների վերաբերյալ: Ըստ փաստաբանի` օրենքն ակնհայտորեն հակասում է ՀՀ Սահմանադրությանը և անձի հիմնարար իրավունքներին ու ազատություններին:

Օրենքը համացանցում նույնպես մեծ քննարկումների առիթ դարձավ, արդյունքում Ֆեյսբուքում ստեծվեց Ընդդեմ կենսաթոշակային 5% պարտադիր վճարին խումբ, որի անդամների թիվն արդեն անցել է 6 հազարը: Համացանցում նախաձեռնվել է ստորագրահավաք, որին միացողները պահանջում են չեղյալ համարել այդ օրենքը:

Ինչպես ՄԻՊ-ին ուղղված նամակում նշել էր փաստաբանը` առաջին հերթին անիրավական է և անընդունելի օրենքում առկա պարտադիր բաղադրիչի գաղափարը, որն ըստ էության, պետության կողմից փորձ է` կարգավորել և սահմանափակել անհատի կողմից իր ֆինանսական միջոցների տնօրինման ազատությունը՝ միաժամանակ զրկելով նրան իր սեփականությունից:

Փաստաբանը կարևոր դիտարկում է արել` նշելով, որ օրենքում առկա են անորոշ և վտանգավոր ձևակերպումներ, որոնք վստահություն չեն ներշնչում հասարակության անդամներին, մի հասարակության, որը ոչ վաղ անցյալում ականատես է եղել բանկային համակարգի բազում անկայունությունների, սնանկությունների և քաղաքացիների ավանդների կորստի:

Ամբողջական նյութը ասյտեղ՝ http://newsbook.am/archives/17943?lang=hyz

Գազի և էլեկտրաէներգիայի սակագների բարձրացումից հետո մեր հանրապետությունում այսօրվա թանկացումները գնալով ահռելի չափերի են հասնում:

 Երեկ «Ժողովուրդ»-ը շրջայց է կատարել Երևանի մի շարք սուպերմարկետներում, խանութներում և արձանագրել որոշ ապրանքատեսակների գների բարձրացում: Օրինակ՝ հացամթերքի շուկայում արձանագրվել է 10-ից 20 դրամի բարձրացում, 20 դրամով թանկացել է կերակրի աղը, իսկ որոշ խանութներում՝ 30-ով, ինչպես նաև՝ տոմատի մածուկը, կոսմետիկ միջոցները՝ լվացքի փոշի, զուգարանի թուղթ, անձեռոցիկ, մի քանի տեսակի շամպուններ:

 Մինչդեռ ՀՀ տնտեսական մրցակցության պաշտպանության պետական հանձնաժողովը հացամթերքի և կոսմետիկ միջոցների շուկաներում վերահսկողություն չի իրականացնում, քանի որ այն համարվում է մրցակցային:

Կատարյալ անհեթեթություն

«Առաջին լրատվական»-ի զրուցակիցն է Կենտրոնական բանկի նախագահ Արթուր Ջավադյանը:

 - Պարոն Ջավադյան, վարչապետ Տիգրան Սարգսյանը 2014թ. բյուջեի նախագիծը ներկայացնելիս այս տարվա տնտեսական աճը խոչընդոտող գործոններից մեկը համարեց Կենտրոնական բանկի կողմից վերաֆինանսավորման տոկոսադրույքի բարձրացումը: Փաստորեն, Ձեր կողմից ձեռնարկված քայլերը բացասաբար են ազդել տնտեսության զարգացման վրա:

 - Իհարկե, տոկոսադրույքի բարձրացումը բերում է տնտեսական ակտիվության որոշակի անկման, բայց՝ երկարաժամկետ առումով: Քանի որ մենք մեր որոշման մեջ հայտարարել ենք, որ պետք է ունենանք ոչ բացասական տոկոսադրույք: Երբ գնաճը մոտ 9,5 տոկոս է լինում, մեր տոկոսադրույքը պետք է լինի դրան համահունչ: Այդ պատճառով էլ վերաֆինանսավորման տոկոսադրույքը 8-ից բարձրացրեցինք 8,5-ի: Բայց միաժամանակ ԿԲ խորհուրդը հայտարարեց, որ եթե գնաճը իջնի մեր հայտարարած, մեր սպասած մակարդակին, մենք անպայման դրա անդրադարձը կանենք և տոկոսադրույքները նորից կնվազեցնենք:

 - Բայց գնաճն էլ կանխատեսված 4+/-1,5 տոկոսից գրեթե կրկնակի ավելի եղավ: Օգոստոս ամսին այն 9,3 տոկոս էր, սեպտեմբերին՝ 8,2 տոկոս: Իսկ գնաճի զսպման պատասխանատուն ԿԲ-ն է:

 - Գնաճի զսպման պատասխանատուն բոլորս ենք, պարզապես դա մեր գլխավոր խնդիրն է: Դեռ հունվար ամսին և այսօր էլ ասել եմ, որ էներգակիրների սակագների բարձրացումը կբերի մոտ 3 տոկոս հավելյալ գնաճի: Եթե մենք այս տարին ավարտենք 7,7 տոկոս գնաճով, և հանենք այդ 3 տոկոսը, այլ պայմաններում ունենում ենք 4 տոկոսից մի փոքր ավելի գնաճ: Բայց հիմա էներգակիրների՝ թե հոսանքի, թե գազի թանկացման ազդեցությունը շատ մեծ է:

 - Բայց իշխանությունների, այդ թվում և Ձեզ համար գաղտնիք չէր, որ էներգակիրները թանկանալու են, հատկապես որ էներգետիկայի նախարար Արմեն Մովսիսյանն անընդհատ կրկնում էր, որ գազի գնի թանկացման հետ կապված բանակցում են ռուսական կողմի հետ:

 - Մենք մշտապես դրա մասին խոսում ենք, դրա համար էլ գաղտնիք չէր: Ես ԱԺ-ում ունեցած իմ ելույթներում ասել եմ, որ 3 տոկոս ավելի գնաճ կունենանք, եթե ավելանա էներգակիրների գինը: Երբ որ գինը հստակ որոշվեց, ես ասում էի 2,5-3 տոկոս:

 - Բայց գնաճը Ձեր ասած 7,7 տոկոսից ավելի բարձր՝ 9,3 տոկոսի հասավ:

 - Ոչ, 9,3 տոկոսը սեզոնային էր և մի ամսում եղավ, բայց մենք այս տարին կավարտենք այն տոկոսադրույքով, որը կանխատեսում ենք: Իսկ հաջորդ տարվա ապրիլ-մայիս ամիսներին կմտնենք մեր կողմից հայտարարված շրջակայքի մեջ՝ 4+/-1,5 տոկոս: Այդ մասին գրել ենք և մեր դրամավարկային ծրագրում, և արդեն մի քանի անգամ հայտարարել ենք:

 - Միշտ տպավորություն կա, որ թե կառավարությունը, թե ԿԲ-ն գնաճը ավելի ցածր են կանխատեսում կամ ցույց տալիս, քան իրականում այն լինում է:

 - Եթե ցածր ցույց տայինք, այդ դեպքում 9,3 տոկոսն ինչո՞ւ էինք ցույց տալիս: Նախ` ցույց տվողը մենք չենք, Վիճակագրական ծառայությունն է: Իսկ 9,3 տոկոսը շատ լուրջ գնաճ է, դրա համար էլ մենք որոշակի միջոցառումներ արեցինք: Ակնհայտ է, որ մեր միջոցառումները զսպում են տնտեսական զարգացումները, բայց ուրիշ գործիքներ չկան: Գործիքներ կան, բայց ամենագործուն գործիքը դա է:

 - Երբեմն կարծիքներ են հնչում, թե ԿԲ-ի ունեցած գործիքները կամ իրավասությունները բավարար չեն ազդելու տնտեսական զարգացումների, գնաճի վրա: Այդ առումով ի՞նչ գործիքի անհրաժեշտություն ունեք:

 - Ոչ մի: Մենք բոլոր գործիքները ունենք և օգտագործել ենք այն բոլոր գործիքները, որոնք օգտագործում են այսօրվա կենտրոնական բանկերը: Մեզ ավելորդ իրավասություններ պետք չեն: Մենք բյուջետային և դրամավարկային կոորդինացված քաղաքականություն ունենք, այդպես էլ պետք է շարունակենք, և ինձ թվում է, որ ամեն ինչ ճիշտ կլինի: Բայց այսպիսի շոկեր լինում են: Եթե հիշում եք 2008թ. էլ միջազգային շուկայում հացի գների բարձրացման հետ կապված շոկ եղավ: Շոկեր լինում են նաև պատերազմների ժամանակ, երբ բարձրանում են բենզինի և նավթի գները: Այդ շոկերն իրենց ազդեցությունն ունենում են երկրների վրա: Բայց ընդհանուր առմամբ այն քաղաքականությունը, որ մենք համակարգում ենք կառավարության հետ, իր դրական արդյունքները կբերի:

 - Մաքսային միությանն անդամակցելը որքա՞ն կնպաստի գնաճին: Փորձագետները կարծիքներ են հնչեցնում, թե այդ անդամակցումն անպայման հավելյալ գնաճ է բերելու: ֆինանսների նախարար Դավիթ Սարգսյանն էլ հայտարարեց, թե այդ անդամակցումը որոշ դեպքերում մաքսատուրքերի բարձրացում կբերի, իսկ դա էլ գնաճ է ենթադրում: Մինչդեռ Դուք ասում եք, որ հաջորդ տարվա ապրիլ-մայիսից գնաճը կմնա ձեր կանխատեսած 4+/-1,5 տոկոսադրույքի սահմաններում:

 - Այդ հարցին լավ պատասխանեց ֆինանսների նախարարը: Փորձագետներն այդ խնդիրը դեռ պետք է ուսումնասիրեն: ՄՄ-ի հետ կապված 97 համաձայնագիր կա, նրանք կարդացե՞լ են այդ համաձայնագրերը: Չեն կարդացել: Հիմա բոլորն ասում են, թե մեքենաների գները բարձրանալու են, իմ կարծիքով` դա անում են հենց մեքենա վաճառող դիլերները, որ թանկացնեն:

 - Այնուամենայնիվ, Ձեր կարծիքով, ՄՄ-ին անդամակցելն ինչպե՞ս է ազդելու Հայաստանի տնտեսության զարգացման, տնտեսական աճի կամ գնաճի վրա:

 - Վերակառուցման և եվրոպական բանկի գլխավոր տնտեսագետը լուրջ ուսումնասիրություն էր արել և կանխատեսել էր, որ ՄՄ-ին միանալը ՀՀ-ին տարեկան բերելու է 1-1,5 տոկոս հավելյալ տնտեսական աճ:

 - Պարոն Ջավադյան, թե գործարարների, և թե քաղաքացիների կողմից չեն դադարում դժգոհությունները, որ վարկերի համար բանկերը շատ բարձր տոկոսադրույքներ են սահմանել:

 - Ո՞ր երկրի հետ համեմատած. Շվեդիայի՞, թե՞ Ռուսաստանի, Ղազախստանի, Վրաստանի կամ Ադրբեջանի հետ:

 - Համենայնդեպս՝ ոչ Մաքսային միության կամ հետխորհրդային երկրների հետ:

 - Մենք պետք է համեմատվենք այն երկրների հետ, որոնք մեր խոշորագույն առևտրային գործընկերներն են և այս տարածաշրջանում են:

 - Եվրամիությունն էլ է մեր երկրի խոշորագույն առևտրային գործընկերը:

 - Ոչ: Մենք կարող ենք համեմատվել ամեն ինչով, եթե մի շնչին ընկնող ՀՆԱ-ով համեմատելի լինենք, ասենք, Միացյալ Թագավորության հետ: Դրա համար էլ վարկերի տոկոսադրույքով էլ չենք կարող համեմատվել: Այս շուկայի ռիսկերը ներառած՝ փողի գինն այդքան է ձևավորվել, և տոկոսադրույքը ձևավորում է շուկան: Վարչական ճանապարհով հնարավոր չէ տոկոսադրույք նվազեցնել, բայց հնարավոր է տարբեր տիպի միջոցառումներով: Ինչպես հիմա կառավարության հետ պարտատոմսերի տոկոսադրույքների նվազեցման ուղղությամբ ենք քայլեր անում: Կառավարությունը որոշ ծրագրեր է սուբսիդավորում, որ վարկերի տոկոսադրույքներն իջեցնի: Այս ճանապարհով կարելի է ազդել, բայց վարչական ճանապարհը ճիշտ չէ: Նման դեպքեր եղել են, չտամ այդ երկրների անունը:

 - Միգուցե բարձր տոկոսադրույքը կապված է բանկերի սեփականատերերի՝ բարձր շահույթ ստանալու ցանկության հետ: Հատկապես, որ որոշ բանկերի սեփականատերերի մեջ նշվում են նախկին կամ ներկա բարձրաստիճան պաշտոնյաների անունները:

 - Գրեթե ոչ մեկն էլ պաշտոնյաների հետ առնչություն չունի: HSBS-ին կամ «Կրեդիտ ագրիկոլ»-ը ո՞ր պաշտոնյաների հետ կապ ունեն:

 - Օրինակ` կարծիք կա, որ նախկին նախագահ Ռոբերտ Քոչարյանը բաժնեմաս ունի «Կոնվերսբանկում» և «Արդշինինվեստբանկում»: Բանկի սեփականատեր նախկին այլ ազդեցիկ պաշտոնյաներ կամ իշխանությունների հովանավորությունը վայելող գործարարներ էլ կան:

 - Ես ԿԲ նախագահն եմ, և իմ ունեցած տեղեկություններով նախկին նախագահը ոչ մի բանկում բաժնեմաս չունի:

 - Պարտադիր չէ, որ դա իր անունով ձևակերպված լինի: Ինչպես նախկին գլխավոր դատախազ Աղվան Հովսեփյանն էր ասում, բաժնեմասը կարող է ձևակերպված լինել «քեռու մարդու» անունով:

 - Չկա նման բան:

 - Տպավորությունն այնպիսին է, որ Դուք պաշտպանում եք վարկերի բարձր տոկոսադրույքը:

 - Ոչ, ոչ: Ես ոչ թե պաշտպանում եմ վարկերի բարձր տոկոսադրույքը, ես պաշտպանում եմ վարկերի շուկայական տոկոսադրույքը: Չի կարող շուկայականից դուրս տոկոսադրույք լինել: Հակառակ դեպքում դա շեղում կմտցնի շուկայում, իսկ ցանկացած շեղում ունենում է իր բացասական հետևանքները:

 - Կարո՞ղ եք առանց համեմատելու ասել, թե վարկերի տոկոսադրույքներն ինչու են Հայաստանում այդքան բարձր: Հիփոթեքային վարկերը տրվում են 12-14 տոկոսով, առևտրային վարկերը՝ 20 և ավելի տոկոսով:

 - Մեզ մոտ տոկոսադրույքները բարձր չեն: Ազգային հիփոթեքային կազմակերպությունը միջինը 12 տոկոսով 4000 վարկառուի 31 մլրդ դրամի վարկ է տվել: Իսկ սպառողական վարկերն ԱՄՆ-ում էլ են բարձր՝ 20-ից ավելի: Ռուսաստանում նույնիսկ 100-200 տոկոսի հասնող վարկեր էին տրվում:

«Եթե մենք լուրջ ուսում­նասիրենք պայմանագրաիրավային համակար­գը, որը գոյություն ունի մեր ռազմավարական գործընկերների, նաև ՀԱՊԿ-ի հետ, կտեսնենք, որ այդ երաշխիքները կան, և դրանք հետզհետե զարգանում են»,- «168 ժամ» պարբերականի  թղթակցի հետ զրույցում ասել է ՀՀ պաշտպանության նախա­րար Սեյրան Օհանյանը՝ ի պատասխան այն հարցին, թե հիմնավոր չե՞ն այն կար­ծիքները, որ Մաքսային միությանն անդա­մակցելով՝ Հայաստանի համար անվտան­գության երաշխիքներ այդպես էլ չեն տրվում, և, որ նման հայտարարություններն իշխանությունների կողմից ընդամենն ար­դարացում է:

 «Նոր երաշխիքներ կան, որով­հետև մենք այս տարի ռազմատեխնիկա­կան համագործակցության զարգացման համաձայնագիր, պլան մշակեցինք ՌԴ-ի հետ, որը հնարավորություն Է տալիս ոչ թե պահպանել, այլ' զարգացնել համագոր­ծակցությունը, և դրանով իսկ հնարավորու­թյուն կա, որ ոչ միայն Պաշտպանության նախարարությունները, այլև՝ մեր կազմա­կերպություններն արդեն երկկողմ շրջա­նակներում կապ ունեն ու կզարգացնեն իրենց համագործակցությունը: Հե­տաքրքրությունները երկուստեք են, և յուրաքանչյուր երկիր ունի իր ծրագրերը, նպատակները»: Իսկ հարցին, թե Մաքսա­յին միությանը չանդամակցելու դեպքում անվտանգության երաշխիքներ չէի՞ն տրվի Ռուսաստանի կողմից, նախարարն այսպես է պատասխանել.

 «Դե, հիմա չանդամակցե­լով. .. բայց ինչո՞ւ չանդամակցել, եթե մենք ունեինք այնտեղ պայմաններ, որոնք կն­պաստեն մեր տնտեսության զարգացմա­նը»:

Վրաստանի նախագահական ընտրություններում որևէ արտառոց բան տեղի չունեցավ՝ հաղթեց Վրաստանի խորհրդարանական ընտրություններում հաղթանակ տարած միլիարդատեր Բիձինա Իվանիշվիլիի նախագահական թեկնածուն, Սաակաշվիլիի կուսակիցը հայտնվեց երկրորդ տեղում, իսկ Նինո Բուրջանաձեն, որը հանդիպումներ էր ունենում ռուսական քաղաքական շրջանակների և նույնիսկ Պուտինի հետ ու պայքարում Սաակաշվիլիի դեմ, մնաց երրորդ տեղում:

Նախևառաջ այս հանգամանքը հատկանշական է նրանով, որ Պուտինի հետ հանդիպող և Վրաստանում իշխանությունների դեմ պայքարող Նինո Բուրջանաձեն ոչ թե ակնածանքի արժանացավ հասարակության շրջանում, թե նա Պուտինի հետ էր նստում-վեր կենում կամ տալիս-առնում, ինչը հավանաբար կասեին Հայաստանում և ինչի մասին Հայաստանի շատ` այսպես կոչված ընդդիմադիրներ կերազեին, այլ հասարակությունը նրան ընդամենը երրորդ տեղ տվեց, մոտ 10 տոկոս ձայնով:

Դա ցույց տվեց, որ Վրաստանի հասարակությունը ռուսական թեկնածուներին տեղ չի տալիս, այլ կերպ ասած՝ ռուսական քաղաքական գիծը Վրաստանում հասարակական պահանջարկ չունի մինչև այսօր էլ, չնայած որ հասարակությունը չի վստահում ակնհայտ հակառուսական կուրսի կրող Միխեիլ Սաակաշվիլիին: Պատահական չէ, որ նոր իշխանությունները ևս հայտարարում են եվրատլանտյան կուրսին հավատարմության մասին, որովհետև դա հասարակական պատվեր է, և նրանք չեն գնա այդ պատվերի դեմ:

Մնացյալ առումով, ընտրություններում եղավ այն, ինչ պետք է լիներ: Հետաքրքիր է այն, ինչ լինելու է հետո: Հայաստանի համար էլ հետաքրքրական է հետոն: Նկատի ունենալով, որ Վրաստանում ուժի մեջ են մտնելու սահմանադրական փոփոխությունները և իշխանական լիազորությունների մի մեծ մասը անցնելու է խորհրդարանին ու կառավարությանը, կարող ենք ասել, որ Վրաստանում այլ բան չի լինի, քան այն, ինչ կա նախորդ տարվա հոկտեմբերից սկսած, երբ Իվանիշվիլիի «Վրացական երազանքը» հաղթեց պառլամենտական ընտրություններում: Այս տեսանկյունից, Հայաստանին Վրաստանից մեծ անակնկալներ չեն սպասվում, և կարելի է կանխատեսել հիմնականում այն, ինչ կար այս ամիսների ընթացքում: Այստեղ շատ ավելի էական է վրացական իրողությունների առավել ընդգրկուն իմաստը, հատկապես Հայաստանի մի շարք քայլերի արդյունքում:

Սեպտեմբերի 3-ին հրաժարվելով եվրաինտեգրման ինտենսիվ քաղաքականությունից և կոնկրետ Ասոցացման գործընթացից` Հայաստանն, ըստ էության, վերջնականապես բաց թողեց Վրաստանին՝ տարածաշրջանային արդիականության համար պայքարում: Եվրոպական կուրսի արդյունքում Հայաստանը տարածաշրջանում հասել էր մի իրավիճակի, երբ ուղղակիորեն վերցրել էր քաղաքական նախապատվությունը Վրաստանից: Խոսքը արևմտյան ազդեցիկ քաղաքական կենտրոնների նախապատվության մասին էր, ինչն ըստ էության պարունակում էր տնտեսական ու ռազմա-քաղաքական անվտանգության հեռանկարներ: Սակայն Հայաստանը կտրուկ հետ կանգնեց այդ ամենից, փոխարենը Վրաստանը նախորդ տարվա հոկտեմբերի խորհրդարանական ընտրություններից հետ զգալիորեն միավորներ կուտակեց իր օգտին, իսկ նախօրեին տեղի ունեցած նախագահական ընտրությունների արդյունքում՝ արդեն Հայաստանի Մաքսային միությանն անդամակցելու մասին կապիտուլյացիոն գործողությունների ֆոնին, կարելի է ասել, էական առաջընթաց արձանագրեց տարածաշրջանի քաղաքական սցենարներում հեռանկարային դերի շուրջ Հայաստանի հետ անուղղակի մրցակցության մասով: Վրաստանը հետ բերեց այդ մրցակցության մեջ կորցրած առավելությունը, թեև այստեղ ավելի շատ կարելի է ասել, որ Հայաստանն իրականում փոշիացրեց իր այն միավորները, որ հավաքել էր Ասոցացման գործընթացի շնորհիվ:

Վրաստանի նախագահական ընտրությունների արդյունքները՝ ոչ թվաբանական, այլ քաղաքական իմաստով հենց այս առումով են կարևոր Հայաստանի համար: Սա, ըստ էության, ունի նաև մեկ այլ կարևոր նրբերանգ: Սա նշանակում է, որ տարածաշրջանն առժամանակ մտնում է քաղաքական վակուումի փուլ: Այսինքն` Հայաստանը հետ է մնացել քաղաքական դերակատարության համար մրցակցությունում, իսկ Վրաստանն էլ, ըստ էության, առաջատարությունը կրկին ստանձնելով` ըստ էության իրենից չի ներկայացնում այն ներուժը, որը թույլ կտա այդ երկրի հետ կապել լուրջ քաղաքական հեռանկարներ և սցենարներ: Սա նշանակում է, որ կովկասյան քաղաքականության առումով առաջիկայում առաջանալու է այս լուրջ սցենարների և հեռանկարների որոշակի ճգնաժամ, դեֆիցիտ, յուրօրինակ դադար, որը հայտնի չէ, թե ինչքան կշարունակվի: Ավելին` ըստ էության կարելի է ասել, որ Միխեիլ Սաակաշվիլիի տապալման պատճառը կարող է համարվել հենց Հայաստանը:

Բանն այն է, որ Ասոցացման գործընթացի մեջ լինելով և ըստ էության ստվերելով Վրաստանի դերակատարությունը` Հայաստանն Արևմուտքի համար ստեղծեց մի իրավիճակ, երբ Սաակաշվիլիին կարելի էր զոհել ավելի չափավոր իշխանության փոխարեն, որը Վրաստանի պարագայում կթուլացներ կոնֆրոնտացիան Ռուսաստանի հետ: Պետք չէ բացառել, որ եթե Արևմուտքի մտքով անցներ, որ Հայաստանը կտրուկ շրջադարձ է կատարելու, ապա Արևմուտքը ավելի մեծ ջանքեր կգործադրեր Սաակաշվիլիի կուսակցության խորհրդարանական հաղթանակի համար` թույլ չտալով նրան զիջել իշխանությունը: Արևմուտքը Վրաստանի հարցում չէր գնա Ռուսաստանի հետ փոխզիջման և Սաակաշվիլիի ռադիկալ իշխանությունը Իվանիշվիլիի իշխանության փոխելու քայլին, եթե կասկածեր Հայաստանի իշխանությունների հաստատակամությանը:

Այսպիսով, ըստ էության պարզ է դառնում Կովկասում արևմտյան ընդհանուր ռազմավարության տապալումը: Միևնույն ժամանակ, այդ ռազմավարությունը տապալվում է ոչ թե մեկ այլ ռազմավարությամբ, այլ, ըստ էության, ոչ մի բանով: Այսինքն` չկա հաղթող ռազմավարություն: Սա էլ հենց նշանակում է վակուում: Եվ սա է ամենամեծ վտանգը, որ առկա է կովկասյան ներկայիս իրավիճակում, քանի որ վակուումի պարագայում իրադարձությունների զարգացումը զգալիորեն դառնում է անկանխատեսելի, որովհետև վերանում են կայուն չափորոշիչները, որոնցից կարող էին բխել հետագա զարգացումների վերաբերյալ քիչ թե շատ հաստատուն կանխատեսումներն ու եզրակացությունները:

ՀՀ նախկին ՃՈ պետ Մարգար Օհանյանն այժմ Դուբայում է:

 Դեռևս հայտնի չէ, թե նա երբ կվերադառնա Հայաստան, բայց իր շրջա­պատում հայտարարել է, թե 2 տարի անազատության մեջ գտնվելուց հետո փորձելու է միառժամանակ հանգստանալ ծովափին: Նշվում է նաև, որ Մ. Օհանյանը միացել է այժմ Դուբայում իրենց հանգիստը վա­յելող տրիոյին՝ ԱԺ ՀՀԿ խմբակցության անդամ Սամվել Ալեքսանյանին, ռուսաստանաբնակ գործարար Սամվել Կարապետյանին և ԲՀԿ առաջնորդ Գագիկ Ծառուկյանին:

Օրեր առաջ, երբ հրապարակեցինք  «Ձեր բարեփոխումները ֆալշ են, պարոն Գասպարյան…օրական քանի՞ էդպիսի նամակ է հանվում արխիվից…» վերտառությամբ բաց նամակը, հրապարակման մեկնաբանությունները մտածելու տեղիք տվեցին: Ի սկզբնաե մի քանի օր երկընտրանքի առաջ էինք կանգնել: Բանն այն էր, որ նամակն անստորագիր էր, կայքի ֆեյսբուքյան էջին ուղարկողը չուներ ո՛չ նկար, ո՛չ հստակ անուն ազգանուն և ո՛չ էլ այլ կոնտակտային տվյալներ կային:

Հրապարակումից օրեր անց Ոստիկանության Ներքին անվտանգության վարչությունից ստացանք նամակ.  «…հոդվածի կապակցությամբ ՀՀ ոստիկանության պետի հանձնարարությամբ ներքին անվտանգության վարչությունում ծառայողական քննություն է իրականացվում:
… հեղինակին, կայքի խմբագրությանը կամ այդ կապակցությամբ որևէ տեղեկության տիրապետող անձանց խնդրում ենք ներկայանալ ՆԱ վարչություն կամ առավել մանրամասն նամակ ուղարկել ՀՀ ոստիկանության ներքին անվտանգության վարչության էլեկտրոնային հասցեին»:

Որոշեցինք և նույն ֆեյսբուքյան էջին նամակ ուղարկեցինք,  խնդրելով առավել մանրամասն նկարագրել և ավել ինֆորմացիայի տիրապետելու դեպքում տրամադրել մեզ: Եվ ահա երեկ ստացանք շատ սպասված նամակը:

ՀՀ ոստիկանապետին

Խնդրում ենք հրապարակումն ընդունեք հայտարարություն հանցագործությունների մասին:

-Բարև Իրականում.քոմ լրատվական: Շնորհակալ եմ նախորդ նամակը հրապարակելու և հիացած արդյունքների համար:

Ասեմ, որ շատ բան է փոխվել Ձեր հրապարակումից հետո, մեզ մոտ են ոստիկանության ներքին անվտանգության վարչության ծառայողները, մեզ են միացել անգամ ծառայողներ, որոնք պարզվեց մեզ հետ են աշխատում, բայց այս 2 օրը առաջին անգամն ենք տեսնում:

Ասեմ, որ Ձեր հրապարակումից հետո, մեզ մոտ՝ Ակադեմիայում պետի գլխավորությամբ տեղի ունեցավ ,,ժողով,,: ,,Ժողովի,, ընթացքում պետը՝ Հովհաննես Վարյանը բորբոքված, վրդոհված ելույթ ունեցավ, վիրավորելով մի շարք աշխատակիցների: Նա ժողովի ընթացքում ասել է.

-Ես պռոբլեմ չունեմ, ու ընդհանրապես ոչ մի բան չունեմ, ոչ մի խանութ չունեմ: Գիտեմ ովքեր են ուզում փնովել ինձ:  Գիտեմ ծառայությունից են ու 2 շաբաթում գտնելու եմ դրանց: Եվ հետո թող վերևները մտածեն, ես պռոբլեմ չունեմ, դաժե ասոբին ես եմ կանչել, ասոբիի հետ էլ խնդիր չունեմ, անցած անգամ էլ կոմպլեքսը էկավ, ինչ արավ,ոնց էկավ ընենց էլ գնաց: Իմ հիմնարկը միակ հիմնարկնա, որ ոչ թե գլխիցա հոտած, այլ պոչից, էս խոսքերը էլի եմ ասել, ու էլի եմ ասում: Մեկա գտնելու եմ ովքեր են էդ հաստատ ու հանելու եմ ռադ անեմ:

Սրանից բացի ձեզ եմ ուզում պատմել էլի բաներ կապված Վարյանի հետ:

Անցած տարի ավարտական 180 ակադեմիայից և մոտ 70 քոլեջի ուսանողներ ընդհանուր 250 ուսանող ամենքը 25,000 դրամ են հավաքել ու տվել Վարյանին: Դա կարող են հավաստել այդ 250 ուսանողները, քանի որ նրանք արդեն ավարտել ու իրենց ծառայությունն են տանում այլ բաժիններում, և կախված չեն Վարյանից ու չեն վախենա: Այդ դրամահավաքների հետևում կանգնած են Վարյանի շպիոնները Գալոյանը՝ Պռադոն քյավառցի ու Օպելի Վաչոն:

Ձեր հրապարակման հաջորդ օրը  հեռակայի քննություններից բոլորը 0 են ստացել, էն դեպքում, որ համարյա բոլորից փող են վերցրած եղել: Իսկ ժողովի ժամանակ հայտարարեց, որ լավա ունենամ 6 սովորող ուսանող քան 100 չսովորող: Իմիջիայլոց կարող եք մի քաի ամիս հետո հետաքրքրվել ու կտեսնեք, որ բոլորն էլ ստացել են քննությունները, այն դեպքում, որ հիմա պատին կպցրած է, որ բոլորը ստացել են 2: Դա արել են վախից ձեր հրապարակումից վախեցած:

Ժողովի ժամանակ նաև հայտարարելա, որ բա ես վերևների համար, բա իրանք ում համար, սաղ օր իրանք են զանգում խնդրում, ընկնում ոտերս թե Վարյան սրան դիր նրան դիր, հեսա սրանից հետո կտենան: Ես իմ հարցերը  վերևներում եմ լուծում, նորմալ մարկանց հետ: Մեկա ինձ հանել չեն կարա, ինչ եմ արել որ, ես հո Գնդոյանը չեմ, որ հարյուր հազար դոլորներ վերցնեմ:

Սա ժողովից հետո զանգելա Բորյա անունով մի ռուսի, ու պատմել այդ մասին:

Մի հատ կուրսի պետ կա Տարոն անունով,  ինքը պիտի ավարտականներին ավարտացներ 4 կուրսի, էս տղան փողից ու պետի խուլիգան գործերից հեռու տղայա, դրան մի ամիս խաբել ասելա դու գործից ազատված ես գործի չգաս, որ իրա ջահելներց դնի կարանան փող հավաքեն: Էս տարի էլի էդ ջահելներինա դրել կուրսերի պետեր, ամեն տարի իրենք են ավարտացնում կուրսերը:

Հեռակայի ուսանողներից 70,000 փող են հավաքում ու էդ անումա պուճուր Գևորը, ու հիմա էդ Գևորը ընդգրկվածա բոլոր հանձնաժողովներում, թե ընդունելիության, թե ավարտական, որ փողերը ինքը հավաքի:

Բա աղջիկը, ըստ ոստիկանության մասին օրենքով մերձավոր ազգականը իրավունք չունի աշխատելու իրա մոտ, բայց Վարյանի աղջիկը հիմա յանմ աշխատումա մեր մոտ էն էլ գիտական բաժնում, էն էլ էն դեպքում, որ նորա ընդունվել մագիստրատուրա, չի էլ գալի գործի, էդ էլ հո Վովանա ստորագրել, որ ընդունվելա: Հա ասեմ, որ ձեր հրապարակումից հետո դաժե Արևհատնա գործի գալի նախկին դատախազի յանմ քուրը, բայց էս մի 2 ամիս էր չկար: Իսկ Չոռնին, պետի շոֆերը արդեն համազգեստով, լեյտենանտը ուսերին սաղ օր մեր մոտ քցածա, հավայ ֆռֆռումա յանմ շոֆեռը չի էլի, սաղ ձևականա:

3 հատ ուսանող ունենք ակադեմիայի 3-րդ կուրս են, Էդ նույն Չոռնիի ծանոթներն են, մեկը հարևաննա մնացածը եսիմ ովքեր, հարուստի թուլեք են, սաղ օր ակադեմիայում ուռում են, պլանքածներ են, կարաք գրեք թող գան դրանց տանեն անալիզի, գրածումս ոչ մի բան սուտ չի կարաք գրեք թող գան սաղ ստուգեն, բայց էս ասոբին դուրս չի գալի լավ չեն աշխատում, հավայ հարցնում են, դու փող վերցրել ես տվել Վարյանին, էդ ովա  գժվել ասի հա, սաղ էլ ասում են չէ: Բայց, որ հեսա մտան ծառայություններ, երևի մի բան կգտնեն գոնե էդ նամակի պահը հաստատ, եթե ձևական չեն էկել էլի: Էդ նառկոշներ անուններն են Պետրոսյան Խորեն, Ավետիսյան Հարություն, Հարությունյան Գարիկ, սաղ էլ ակադեմիայի 3-րդ կուրս են, էն աստիճան պռախոդ ունեն, որ շենքի մեջ են դե պլան ծխում:

Իսկ տեղակալը Եսայանը օգտվելով էս խառը վիճակից մարդկանցա ներգրավում իրա թիմ, նյութերա հավաքում Վարյանի դեմ, որ Վարյանին հանելուց հետո ինքը նստիՎարյանի տեղը; Հա ասեմ, որ ներսի ճաշարան ու 1 հատ կաֆեն իրաննա, սաղ անօրինական ոչ հարկա տալի, ոչ տուրք, օգտագործումա մեր լույսա բանա սաղ, իսկ մի կաֆեն թիկունքի գծով տեղակալիննա: Ու էս թիկունքի տեղակալը  Ասրյան Հարութը, չինական սումկեքա ծախում ուսանողներ վարա, պարտադրելով, որ առնեն 5000 դրամ, էն դեպքում, որ Մալաթիա շուկայում 1500 դրամա:

Միխեիլ Սաակաշվիլին տեսախցիկների առաջ հավաքում էր իր իրերը` նախագահական նստավայրը լքելու համար:  Սաակաշվիլու կինը` Սանդրան, մասնավոր զրույցներում ասում է, որ շատ ուրախ է վարադառնալ հանգիստ կյանքի, մինչդեռ Սաակաշվիլու շրջապատը և ամերիկացի պաշտոնյաները նրան խորհուրդ են տալիս լքել Վրաստանը և տեղափոխվել ԱՄՆ` խուսափելով գործող վարչապետ Բիձինա Իվանիշվիլու ոտնձգություններից, ով խոստացել է դատի տալ Սաակաշվիլուն:

Բիձինա Իվանիշվիլին այսպիսի հայտարարություն մեկ անգամ չէ, որ արել է: Մանավանդ, որ Սաակաշվիլու ամենամտերիմ ընկերներից մեկը` երկրի նախկին վարչապետ Վանո Մերաբիշվիլին արդեն բանտում է:

Թերթը հիշեցնում է, որ 2004 թվականին նա ստացել էր ընտրողների ձայների 95%-ը, 2008-ին` 53%-ը, իսկ երեկ կայացած նախագահական ընտրություններում նրա թեկնածու Դավիդ Բաքրաձե ստանում է  ձայների 21 տոկոսը:

«Վերջին բլոգ»-ը «Հույժ գաղտնի» էջեր նախագծով սկսում է հանրությանը ներկայացնել կարևորագույն իրադարձություններ, որոնք տեղի են ունեցել «Հոկտեմբերի 27-ի» գործով նախաքննության ժամանակ:

Շարքի առաջին նյութում ներկայացնում ենք, ՀՀ նախագահ (1998-2008 թթ.) Ռոբերտ Քոչարյանի աշխատակազմի ղեկավար Ալեքսան Հարությունյանի դիմումը այն ժամանակվա նախագահ Ռոբերտ Քոչարյանին, որից 2 ամիս անց Ալեքսան Հարությունյանը ազատ է արձակվում, ավելի ստույգ փոխվում է նրա խափանման միջոցը, իսկ հետագայում նրա նկատմամբ հարուցված քրեական գործը կարճվում է:

Նշենք, որ Ալեքսան Հարությունյանը մեղադրվել է Հոկտեմբերի 27-ի կատարողներին աջակցելու, խորհուրդներ տալու մեջ:

Ալեքսան Մաքսիմի Հարությունյանը կալանավորվել  է 1999 թվականի դեկտեմբերի 15-ին, այսինքն Հոկտեմբերի 27-ի ահաբեկչությունից  մեկ ամիս 20 օր անց:

Ահա թե ինչ է գրում Ալեքսան Հարությունյանը ՀՀ այն ժամանակվա նախագահ Ռոբերտ Քոչարյանին: Ի դեպ ավելացնենք, որ դիմումը գրված է Ազգային անվտանգության մեկուսարանից՝ «ԿԿԲ-ի պադվալից»:

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀ

ՊԱՐՈՆ  Ռ. ՔՈՉԱՐՅԱՆԻՆ

Մեծարգո նախագահ

Ուղարկում եմ ԱԱ քննչական մեկուսարանի կալանավոր Ալեքսան Մաքսիմի Հարությունյանի Ձեզ հասցեագրված դիմումը:

Առդիր՝ Դիմումը՝ 2 թերթ:

ՀԱՐԳԱՆՔՈՎ՝                 /ստորագ/                                                  Գ. ԳՐԻԳՈՐՅԱՆ

Հ. 31

գ.թ. 179-180

շտամպ 22.02.2000թ                           Հայաստանի Հանրապետության նախագահ

Արդարատատության խորհրդի նախագահ

Պարոն Ռոբերտ Քոչարյանին

Մեծարգո  պարոն նախագահ

1999թ. դեկտեմբերի 15-ից ես գտնվում եմ ՀՀ ԱԱՆ մեկուսարանում: Ինչպես գիտեք, ես գիտակցաբար գնացի այդ քայլին, թեև ոչ մի մեղք չունեի, հույս ունենալով, որ կարճ ժամանակում կհերքվեն իմ դեմ եղած հրեշավոր զրպարտությունները և խոսակցությունները: Դուք գիտեք, որ ես անմեղ եմ: Դուք գիտեք գործի մանրամասները, ուստի ես չեմ կրկնի:

Սակայն, այս ընթացքում, ճշմարտությունը պարզելու փոխարեն, այն ավելի ու ավելի են խճճում: Կեղծ ցուցմունքների, զրպարտությունների և անհետությունների հիման վրա, մինչև այժմ գտնվում են այստեղ, և վերջը չի երևում: Վերջին  մի քանի օրը դրան գումարվում է բռնությունը, շանտաժը և սպառնալիքը: Եթե անգամ իմ նկատնանբ այսքան անօրինականություն է կատարվում,ես պատկերացնում եմ թե վիճակն ընդհանրապես ինչպիսին է :

Ես նախաքննական մարմնին հայտնել եմ ողջ ճշմարտությունը, որից պարզ երևում է, որ ես ոչ մի առնչություն չունեմ հոկտեմբերի 27-ի հետ, որ անհեթեթություն է ինձ նման բաներում կասկածելը, սակայն այժմ փորձ է արվում ինձնից կորզել ստեր,որոնք գոնե ինչ-որ  «տեսք» կտան անտրամաբանական շղթային:

Պատմությունը չի ների այս տեսակ կեղծիքը, Վազգեն Սարգսյանի հիշատակը չի կարելի պղծել սարսափելի կեղծիքով: Մի ելք կա միայն. փոխել քննությունը վարողներին նրանք իրենք իրենց  ստեղծած ստերի գերին են դարձել, վախենում են պատասխանատվությունից: Ցանկացած օբյեկտիվ նոր քննիչ մեկ օրում կհասկանա ամեն ինչ:

Նորից եմ կրկնում, ես անմեղ եմ: Ինձ պետք է շտապ ազատ արձակել, որպեսզի չխոչնդոտվի արդարության իրականացումը, այլապես՝ ես պատանդ եմ դարձել քննությունը վարող մարմնի ձեռքում:

Եթե ինձ հետ ինչ-որ բան պատահի, մի բան, որ կարող է լինել ամեն օր, իմ արյունը մեղավորների վրա էժան չի նստելու, ոչ ոք չի ներելու: Վազգեն Սարգսյանի և մյուս զոհերի հոգիները չեն ներելու: Ասված չի ներելու:

Ես արդեն ոչնչի չեմ հավատում: Երջանիկ եղեք:

Մնաք բարով:

Ալեքսան Հարությունայան

/Ձեր խորհրդական, այժմ՝  ԱԱՆ  ՔՄ  կալանավոր/

22.02.2000թ.

Ռոբերտ Քոչարյանին դիմում գրելուց և երջանկություն մաղթելուց հետո դատարանը որոշում է մերժել քննչական մարմնի միջնորդությունը՝ և փոխել Ալեքսան Հարությունյանի խափանման միջոցը՝ կալանքը:

Ներկայացնում ենք նաև դատարանի որոշումը՝ Ալեքսան Հարությունյանին կալանավորելու մասին միջնորդությունը մերժելու մասին:

Ո Ր Ո Շ Ո Ւ Մ

Կալանքի տակ պահելու ժամկետի երկարացման միջնորդությունը քննության առնելու մասին

10.04.2000թ.  ք.Երեւան

Երեւանի Արաբկիր և Քանաքեռ-Զեյթուն Համայնքների առաջին ատյանի …

ՀՀ Զինվորական դատախազության քննչական բաժնի պետ Ա.Հարությունյանի միջնորդությամբ թիվ 62207199 քրեական գործով մեղադրյալ Ալեքսան Հարությունյանի նկատմամբ խափանման միջոց կալանքը ևս 2 ամիս ժամանակով  երկարացնելու վերաբերյալ մերժել:

Որոշման մեկական օրինակ հանձնել միջնորդություն հարուցած կողմին,մեղադրյալին,պաշտպանին

Որոշումը կարող է բողոքարկվել ՀՀ քրեական եւ Զինվորական գործերով վերաքննիչ  դատարանը հրապարակման օրվանից 15-օրյա ժամկետում:

ԴԱՏԱՎՈՐ                     /ստորագ/                Ա .ԱՌԱՔԵԼՅԱՆ

Հ.31                                                                     ՀՀ  ՔՐԵԱԿԱՆ  ԵՎ  ԶԻՆՎՈՐԱԿԱՆ

գ.թ.188                                                                ԳՈՐԾԵՐՈՎ ՎԵՐԱՔՆՆԻՉ ԴԱՏԱՐԱՆԻ

շտամպ 12.04.2000թ.                                         ՆԱԽԱԳԱՀ,ՊԱՐՈՆ  Ռ.Ե.ԱԶԱՐՅԱՆԻՆ