Սիրիայում մեկ օրում մոտ 100 մարդ է զոհվել

Սիրիայում իրավապահների ու նախագահ Բաշար ալ Ասադի հակառակորդների միջև զինված բախումների հետևանքով միայն հունվարի 30-ին զոհվել է մոտ 100 մարդ:

Ինչպես հաղորդում է France presse գործակալությունը` վկայակոչելով «Մարդու իրավունքների մոնիթորինգի սիրիական կենտրոն»-ին (OSDH), զոհերից նվազագույնը 55-ը խաղաղ բնակիչներ են: 40 զոհի մասին տեղեկություն ստացվել է սիրիական Հոմս քաղաքից, 9 զոհ գրանցվել է Դերաա քաղաքում, ևս 5-ը` Դամասկոսի մերձակայքում, 1 մարդ էլ զոհվել է Իդլիբում:

Զոհերի թվում, բացի խաղաղ բնակիչներից, կան 25 զինծառայող, իրավապահ մարմինների 6 աշխատակից, ընդդիմությանը միացած բանակի 10 դասալիք:

Սիրիայում 2011 թվականի մարտից սկիզբ առած անկարգությունները խլել են, ՄԱԿ-ի տվյալներով, մոտ 6.000 մարդու կյանք: Ընդդիմությունը պահանջում է նախագահ Բաշար ալ Ասադի հրաժարականը:

Ինչպես այսօր առավոտյան տեղեկացրել էր Tert.am-ը` վկայակոչելով ռուսական «Ինտերֆաքս» գործակալությանը, ՄԱԿ-ի Անվտանգության խորհուրդն այսօր Նյու Յորքում կանցկացնի Սիրիայում իրավիճակի խնդրով նիստ, որտեղ կքննարկվի արաբա-եվրոպական բանաձևի նախագիծը (այն մշակել են Ֆրանսիան, Մեծ Բրիտանիան, Գերմանիան, Պորտուգալիան, ԱՄՆ-ն, Կատարը և Մարոկոն): ՄԱԿ-ի ԱԽ նիստին կմասնակցեն արևմտյան բարձրաստիճան պաշտոնյաներ, այդ թվում` Ֆրանսիայի և Մեծ Բրիտանիայի արտաքին գործերի նախարարներ Ալեն Ժյուպեն ու Ուիլյամ Հեյգը: Նիստում ելույթ կունենա Արաբական երկրների լիգայի (ԱԵԼ) գլխավոր քարտուղար Նաբիլ ալ Արաբին:

Ամերիկան անցնելու է արհեստական ինտելեկտով անօդաչու սարքերի կիրառմանը

Առաջիկա 30 տարում ԱՄՆ զինված ուժերը անցնելու է արհեստական ինտելեկտով կառավարվող անօդաչու սարքերի կիրառմանը, որոնք օժտված կլինեն օբյեկտների ոչնչացման մասին ինքնուրույն որոշումներ կայացնելու հնարավորությամբ: Reuters-ը գրում է, որ դա հնարավոր կդառնա գերարագ համակարգիչների ստեղծման և նոր ծրագրային ապահովման շնորհիվ:

Նման ռոբոտների կիրառման էթիկական հարցերի շուրջ քննարկումները սկսվել էին հունվարի 26-ին այն բանից հետո, որ Պենտագոնը հայտարարել էր 100 հազ անօդաչուների գնման մասին: Դրանք ներկայում լայնորեն կիրառվում են Աֆղանստանում:

Այդ տեսակի անօդաչու սարքերը կառավարվում են հատուկ օպերատորների կողմից, սակայն նախատեսվում է մինչ 2047-ը «ամբողջությամբ բացառել մարդկային գործոնը»: Դրանք աշխատելու են «Դիտարկում-կողմնորոշում-որոշում-գործողություն» սխեմայով, որը հիմա արվում է մարդու կողմից, սակայն զինվորականները կկարողանան չեղյալ համարել անօդաչու սարքերի ընդունած որոշումները:

«Համակարգերը կկարողանան մարտական որոշումներ կայացնել և գործել իրավական դաշտում, առանց մարդկային գործոնի», - ասված է Պենտագոնի զեկույցում:  

Թուրքիան դատարանում կպարզի իրանական գազի գինը

Թուրքիան այսօր Իրանի դեմ հայց է ներկայացրել Միջազգային արբիտրաժային դատարան` վիճարկելու Իրանից ներկրվող գազի սակագինը: Այս մասին հայտնում է TRT Haber հեռուստաալիքը:

Ավելի վաղ Թուրքիայի էներգետիկայի և բնական պաշարների նախարար Թաներ Յըլդըզը հայտնել էր, որ Իրանը չի համաձայնել Թուրքիայի պահանջներին` իջեցնել արտահանվող գազի գինը:

1996 թ-ին Իրանն ու Թուրքիան համաձայնագիր են կնքել տարեկան 10 մլրդ խորանարդ մետր գազ Թուրքիա մատակարարելու մասին (օրական 30 մլն խորանարդ): 2011 թ-ին իրանական գազի արտահանումը Թուրքիա աճել է 12 տոկոսով` համեմատ 2010 թ-ի (օրական 24 մլն խմ գազ):

Թուրքական պետական Botas ընկերության վիճակագրական տվյալների համաձայն` 2011 թվականին Թուրքիան Իրանից ներմուծել է 39.7 մլրդ խորանարդ մետր գազ:

Թուրքիա գազ արտահանողների առաջատարը Ռուսաստանն է, որին հաջորդում են Իրանն ու Ադրբեջանը:

Սաակաշվիլին Օբամային ասել է, որ հեռանում է

Վրաստանի ընդդիմությունը գոհունակություն է հայտնել նախագահ Միխեիլ Սաակաշվիլիի` ԱՄՆ նախագահ Բարաք Օբամայի հետ հանդիպմանը հնչեցրած հայտարարության կապակցությամբ: Սաակաշվիլին հունվարի 30-ին Սպիտակ տանը կայացած հանդիպմանն ասել էր, որ 2013 թվականին Վրաստանը կունենա նոր նախագահ:

Ինչպես հաղորդում է ռուսական vz. ru-ն, «Ազատ ժողովրդավարներ» կուսակցության քաղաքական քարտուղար Ալեքսի Պետրիաշվիլին նշել է, որ «Սաակաշվիլին ամենաբարձր մակարդակով խոստովանել է, որ ավարտում է նախագահի քաղաքական կարիերան»:

Նա ընդգծել է, որ ՄԱԿ-ում Վրաստանի նախկին մշտական ներկայացուցիչ Իրակլի Ալասանիայի գլխավորած կուսակցության համար այս հայտարարությունը նշանակում է, որ «Սաակաշվիլին իրեն համարում է անցյալի քաղաքական գործիչ»:

«Ազատ ու արդար ընտրությունների ճանապարհով իշխանության ղեկին պետք է գա նոր, այլընտրանքային քաղաքական ուժ»,- ասել է Պետրիաշվիլին:

Քաղաքական քարտուղարը նաև գոհունակություն է հայտնել Բարաք Օբամայի հայտարարության առնչությամբ, ով այս տարվա խորհրդարանական ու հաջորդ տարվա նախագահական ընտրություններում Վրաստանի իշխանությունները ժողովրդավարական ճանապարհով փոխանցելու անհրաժեշտություն էր հայտնել:

Ալասանիայի գլխավորած «Ազատ ժողովրդավարներ» կուսակցությունը կոալիցիա է կազմել ընդդիմադիր միլիարդատեր Բիձինա Իվանիշվիլիի հետ: 

Էրդողանը, Գյուլը, Դավութօղլուն ողջունել են ֆրանսիացի սենատորների որոշումը

Պաշտոնական Անկարան ողջունել է ցեղասպանությունների ժխտումը քրեականացնող օրինագծի սահմանադրականությունը վիճարկելու նպատակով Սահմանադրական խորհուրդ դիմելու ֆրանսիացի սենատորների որոշումը։

Այսօր հայտնի դարձավ, որ  Ֆրանսիայի Սենատի կողմից օրեր առաջ  ընդունված ցեղասպանությունների ժխտումը քրեականացնող օրինագծի սահմանադրականությունը որոշելու նպատակով Ֆրանսիայի Սահմանադրական խորհուրդ դիմում է ներկայացվել (անհրաժեշտ 60 ստորագրության փոխարեն 72 սենատորի ստորագրություն էր հավաքվել)։

«Բազմադարյա ժողովրդավարական ավանդույթներ ունեցող երկրի խորհրդարանականները ճիշտ քայլ կատարեցին՝ ի պաշտպանություն իրենց արժեքների»,–ասել է Գյուլը։

Թուրքիայի վարչապետ Ռեջեբ Թայիբ Էրդողանն էլ ասել է, թե ֆրանսիացի սենատորները Ֆրանսիայի ժողովրդավարական ավանդույթներին համապատասխանող քայլ են ձեռնարկել։

Իսկ արտգործնախարար Ահմեթ Դավութօղլուն նշել է, թե ֆրանսիացի սենատորները, սահմանադրական խորհուրդ դիմելով, «պաշտպանում են իրենց երկրի պատմական արժեքները»։ Նա հավելել է, թե Թուրքիան ուշադիր հետևում է օրինագծի շուրջ զարգացումներին և ակնկալում է, որ Սահմանադրական խորհուրդն արդարացի որոշում կկայացնի։

Ֆրանսիայի Սենատը հունվարի 23–ի լույս 24–ի գիշերը ձայների 127 կողմ և 86 դեմ հարաբերակցությամբ ընդունեց ցեղասպանությունների ժխտումը քրեականացնելու մասին օրինագիծը (օրինագիծը վերաբերում է Ֆրանսիայի կողմից ճանաչված ցեղասպանությունների ժխտման քրեականացմանը։ Ֆրանսիան Հայոց ցեղասպանությունից բացի ճանաչել է նաև հրեաների ցեղասպանությունը՝ Հոլոքոստը, որի ժխտումն արդեն իսկ քրեականացված է Ֆրանսիայում):

Նոր օրինագծի համաձայն՝ Ֆրանսիայում Հայոց ցեղասպանությունը ժխտողներին 1 տարվա ազատազրկում է սպառնում և 45.000 եվրո տուգանք։

Սենատում օրինագծի քվեարկությունից առաջ Էրդողանը հայտարարել էր, թե օրինագծի ընդունումը շատ ծանր հետևանքներ է ունենալու թուրք–ֆրանսիական քաղաքական, տնտեսական և մշակութային հարաբերությունների համար։ Պաշտոնական Անկարան այժմ հայտարարում է, թե սպասում է վերոնշյալ օրինագծի շուրջ զարգացումներին և համապատասխան քայլեր ձեռնարկելու է վերջնական որոշումից հետո։

Ցեղասպանության ժխտումը քրեականացնող օրինագիծը կվիճարկվի Ֆրանսիայի ՍԴ- ում

Հայոց ցեղասպանության ժխտումը քրեականացնող օրինագիծը բողոքարկվելու է Ֆրանսիայի սահմանադրական դատարանում:

Թուրքական TRT Haber հեռուստաընկերության տեղեկացմամբ, Սենատում հավաքվել է անհրաժեշտ թվով ձայներ, օրինագծի` երկրի սահմանադրությանը համապատասխանությունը ստուգելու համար: Նշվում է, որ անհրաժեշտ 60-ի փոխարեն, օրինագծի հակառակորդները հավաքել են 70 սենատորի ստորագրություն:

Հիշեցնենք, որ Ֆրանսիայի կողմից ճանաչված ցեղասպանությունների ժխտումը քրեականացնող օրինագիծն ընդունվել էր հունվարի 23-ին` 127` կողմ, 86` դեմ ձայների հարաբերակցությամբ: Ֆրանսիական կառավարությունը մինչ այսօր պետականորեն ճանաչել է միայն Հոլոքոստն ու Հայոց ցեղասպանությունը, և քանի որ Հոլոքոստի ժխտումն արդեն քրեականացված է, ընդունված օրինագիծը փաստացիորեն վերաբերում է Հայոց ցեղասպանությանը: 

Գյումրու քաղաքապետ Վարդան Ղուկասյանը ձեռք կբերի Հովհաննես Թումանյանի Թբիլիսիի տունը

«Սա ինձ համար լուսապսակ սրբություն, եկեղեցի կառուցելու նման մի բան է»,-նշեց Գյումրու քաղաքապետ Վարդան Ղուկասյանը, ով, ինչպես այսօր հայտնի դարձավ իր սեփական միջոցներով ձեռք կբերի Հովհաննես Թումանյանի Թբիլիսիի տունը:

Իր նախաձեռնությունը Ղուկասյանն այսպես բացատրեց. «որ մեր Ամենայն հայոց բանաստեղծի տունը գնենք և հատկացնենք մեր ժողովրդին»:

 Գրողների միության նախագահ Լևոն Անանյանը լրագրողներին հայտնել էր, որ բնակարանը գնելու բանավոր պատրաստակամությունից բացի`Ղուկասյան եղբայրները նաև պարտավորագիր են տվել ԳՄ նախագահին այդ մասին:

Գյումրու քաղաքապետը  տեղեկացրեց, որ Թումանյանի բնակարանը գնելու ցանկություն վաղուց ուներ և այդ մասին հայտնել էր: «Բայց ասացին, որ բարերար կար, չգիտեմ էլ ով է եղել, բայց երեկ ԳՄ նախագահ Լևոն Անանյանը ինձ ասաց, որ չի ստացվել, գումարը չկա և ես շատ ուրախացա»,- մանրամասնեց Վարդան Ղուկասյանը:

Հիշեցնենք, որ մի քանի օր առաջ վարչապետ Տիգրան Սարգսյանի մոտ տեղի ունեցած խորհրդակցության ժամանակ մեծանուն գրողի թոռնուհի Իրմա Սաֆրազբեկյանը տեղեկացրել էր, որ իր պապի` Թբլիսիում գտնվող տունն արդեն գնորդ ունի որն, ի դեպ, մտադրություն էր հայտնել գործարքից հետո այն նվիրել Թբիլիսիի հայկական համայնքին` հետագայում մշակութային կենտրոնի վերածելու պայմանով:

պետք է լինեն լիդերներ և անբիծ մարդիկ

Եթե Հայ ազգային կոնգրեսի համամասնական ցուցակը կազմելու գործն անձնապես ՀՀՇ վարչության նախագահին մնար, ապա նա ցուցակի անունները կորոշեր համաժողովրդական հանրաքվեի արդյունքում: Այս մասին Tert.am-ին ասաց Հայոց համազգային շարժում կուսակցության նախագահ Արամ Մանուկյանը՝ նման քայլը պատճառաբանելով այսպես. «որպեսզի այդ անունները ժողովուրդը որոշեր, թե ով է իր՝ ժողովրդի քիմքին ավելի հարազատ »:

Նշենք, որ ՀՀՇ առաջնորդի վերջերս արած նմանատիպ հայտարարությունը , որ ՀԱԿ համամասնական ցուցակում պետք է լինեն նրանք, «ովքեր անբիծ են», «լիդեր» ու «դավաճան չեն», կարծես թե այնքան էլ միանշանակ չէր ընդունվել Կոնգրեսի անդամ կուսակցություններից «Հանրապետության» ներսում։ Մասնավորապես, «Հանրապետություն» կուսակցության անդամ Սուրեն Աբրահամյանը այսօրվա մամուլում նախ հայտարարել էր, թե Արամ Մանուկյանը «մեկ-մեկ էքստրավագանտ բաներ է ասում», ապա ավելացրել, որ չի կարողանում հասկանալ, թե ինչ նպատակով է այդ ամենն ասել:

Առանց որևէ մեկին հակադարձելու, Արամ Մանուկյանը կրկնեց, թե ինչ նկատի ունի ինքը այս հայտարարությամբ՝ «որ ՀԱԿ համամասնական ցուցակում պետք է լինեն լիդերներ և անբիծ մարդիկ»:

Արամ Մանուկյանը չի բացառում, որ ՀԱԿ համամասնական ցուցակի կազմման ընթացքում կլինեն մարդիկ, որոնք կդժգոհեն, բայց այլ տարբերակ չկա: Հիշեցնենք, որ երեկվանից պաշտոնապես հայտնի դարձավ միայն այն, որ ՀԱԿ-ի համամասնական ցուցակի առաջին երկու «հորիզոնականները» կգլխավորեն Լևոն Տեր-Պետրոսյանն ու Ստեփան Դեմիրճյանը:

Մարդու իրավունքների պաշտպանն ընդունել է Մեծ Բրիտանիայի դեսպանին

Այսօր Մարդու իրավունքների պաշտպան Կարեն Անդրեասյանն ընդունել է Հայաստանում Մեծ Բրիտանիայի արտակարգ և լիազոր դեսպան Քեթրին Ջեյն Լիչին:

Ըստ ՄԻՊ գրասենյակի հաղորդագրության` դեսպանը կարևորել է պաշտպանի գրասենյակի դերակատարումը երկրում մարդու իրավունքների պաշտպանության և ընտրական գործընթացներում:

Հանդիպման ընթացքում քննարկվել են մարդու իրավունքների պաշտպանության և խթանման վերաբերյալ մի շարք հարցեր, ինչպես նաև առաջիկա խորհրդարանական ընտրությունները և Պաշտպանի գրասենյակի ներգրավվածությունը ընտրական գործընթացներում:

Հանդիպման վերջում մասնակիցները կարևորեցին երկկողմանի կապերի ամրապնդումը և փոխանակվեցին համագործակցության կոնկրետ առաջարկներով, որոնք կքննարկվեն ապագայում:

ՀՀԿ-ից հերքում են, որ կուսակցության պաշտոնական կայքը գրոհել են

ԱԺ «Հանրապետական» կուսակցության պատգամավոր Արտակ Զաքարյանը հերքում է երկու հայաստանյան կայքերում հրապարակված այն տեղեկատվությունը, որ հունվարի 29-30-ը կոտրված 13 հայկական կայքերի թվում է նաև ՀՀԿ պաշտոնական կայքը: «Ոչ ոք չի կոտրել ՀՀԿ կայքը, նորմալ գործում է»,- ասաց նա:

Ավելի վաղ համացանցում տեղեկատվություն էր տարարածվել, որ «Հանրապետականի» կայքիռուսերեն և հայերեն տարբերակները հարձակման են ենթարկվել։

Չնայած նրան, որ մասնավորեցրինք, որ խոսքը կայքի ռուսերեն և անգլերեն տարբերակների մասին է, որոնք մեր զրույցի պահին չէին բացվում, հանրապետական պատգամավորը, միևնույնն է, պնդեց, որ դրանք նորմալ գործում են և խնդիրը մեր համակարգչով պայմանավորեց։

Ավելին, Արտակ Զաքարյանի հավաստմամբ՝ ՀՀԿ-ն շուտով հանրությանը կներկայացնի իր նոր կայքը: Սա, ըստ Արտակ Զաքարյանի, ոչ մի կապ չունի առաջիկա խորհրդարանական ընտրությունների հետ:
«Անկախ ընտրություններից, արդեն 6-րդ տարին էր, և թարմացումների կարիք կար»,- ասաց Հանրապետական պատգամավորը: 

Դավիթ Հարությունյանը լսումների հարցում խնդիր չի տեսնում

Վաղը կայանալիք ԱԺ պետաիրավական հանձնաժողովի նիստում կորոշվի՝ անցկացնե՞լ խորհրդարանական ընդդիմության և «Բարգավաճ Հայաստան» կուսակցության՝ հարյուր տոկոսանոց համամասնական ընտրակարգի անցնելու առաջարկի վերաբերյալ Ազգային ժողովում լսումներ կազմակերպելու հարցը: Այս մասին Tert.am-ին հայտնեց ԱԺ պետաիրավական հանձնաժողովի նախագահ, ԵԽԽՎ-ում հայաստանյան պատվիրակության ղեկավար Դավիթ Հարությունյանը:

«Խնդիր չեմ տեսնում»,- լսումներ անցկացնելու նպատակահարմարության մասին իր անձնական տեսակետը ներկայացրեց Դավիթ Հարությունյանը:

Հիշեցնենք, որ վերջինս, համաձայն մամուլի հրապարակումների՝ «Հանրապետական» կուսակցության շտաբում համակարգում է միջազգային դիտորդների հետ աշխատանքը: 

Հարցին, թե ճի՞շտ են այն տեղեկությունները, որ այս անգամ ՀՀ իշխանությունների դիմաց միջազգային տարբեր կառույցները, որոնք դիտորդական առաքելություններ են անցկացնում Հայաստանում, շատ խիստ են դրել ընտրությունները չկեղծելու պահանջը, Դավիթ Հարությունյանը պատասխանեց հարցով. «Ինչ է նշանակում՝ շատ խիստ են դրել, դա կիսահղիի նման մի բան է»: Այսինքն՝ ըստ ԵԽԽՎ-ում հայաստանյան պատվիրակության ղեկավարի՝ միջազգային դիտորդական գնահատականները հիմնված են որոշակի եվրոպական չափանիշների վրա, որոնք անփոփոխ են:

Համաձայնելով մեր այն դիտարկմանը, թե միջազգային առաքելությունների եզրակացությունները միջանկյալ զեկույցներից վերջնականն ընկած ժամանակահատվածում գնահատականների առումով էականորեն փոփոխվում են, ԵԽԽՎ-ում հայաստանյան պատվիրակության ղեկավարը նշեց. «Այո, բայց դա չի նշանակում, որ այդ չափանիշները փոփոխվում են»:

Դավիթ Հարությունյանին հայտնի չէ՝ այս ընտրություններին միջազգային դիտորդներն ավելացնելո՞ւ են իրենց ներկայացուցչական կազմը կամ առաքելության ժամկետը, թե ոչ:

Ֆրանսիան արագացնում է Աֆղանստանից զորքերի դուրսբերումը

Ֆրանսիայի նախագահ Նիկոլա Սարկոզին հայտարարել է, որ Աֆղանստանում տեղակայված 3600 զինծառայողները հայրենիք կվերադառնան 2013թ. վերջին` միջազգային կոալիցիայի զորքերի, ԱՄՆ նախագահ Օբամայի կողմից նշանակված, վերջնական դուրսբերման ժամկետից մեկ տարի շուտ:

BBC-ի հաղորդմամբ` Սարկոզին ասել է, որ մտադիր է ԱՄՆ-ին և ՆԱՏՕ-ին համոզել, որ հաջորդ տարի բոլոր ռազմական գործողություների հավատարմագրերը հանձնվեն աֆղանական բանակին և անվտանգության ուժերին:

Ֆրանսիայի նախագահը նման հայտարարություն է արել Փարիզում Աֆղանստանի նախագահ Համիդ Կարզայի հետ կայացած բանակցություների ավարտին:

Սարկոզին նաև հայտնել է, որ հնարավոր է վերսկսվեն Աֆղանստանի տարածքի ֆրանսիական ռազմաբազաներում աֆղանական զինուժի ուսուցման ծրագրերը:

Հիշեցնենք, որ ուսուցումը դադարեցվել էր մեկ շաբաթ առաջ, երբ աֆղանական բանակի համազգեստով մարդը 4 ֆրանսիացի զինծառայող էր գնդակահարել:

Իսրայելը դեռ ռազմական հարված չի հասցնի Իրանին

Իսրայելը դեռ չի պատրաստվում ռազմական հարված հասցնել Իրանին, քանի որ դեռ չեն կիրառվել բոլոր խաղաղ միջոցները` միջուկային խնդիրի լուծման համար: Այս մասին հայտարարել է Իսրայելի Արտաքին գործերի նախարարության գլխավոր տնօրենի տեղակալ Աննա Ազարին, գրում է interfax.ru-ն:

«Կարծում ենք, որ դեռ չեն կիրառվել բոլոր խաղաղ մեթոդները: Մենք կարծում ենք, որ պետք է ճնշում գործադրել պատժամիջոցների օգնությամբ, ՄԱԿ-ի որոշումներով», - ասել է նա:

«Եթե ցանկանանայինք ռազմական գործողություններ կատարել, ապա այսքան էներգիա չէինք ծախսի այլ մեթոդների կիրառման վրա», -հավելել է մեկ այլ իսրայելացի պաշտոնյա:

Թուրքիան ֆինանսական օգնություն է ցուցաբերելու ՀԱՄԱՍ-ին

Թուրքիան մոտ ապագայում սկսելու է պաղեստինյան ՀԱՄԱՍ շարժմանը ֆինանսական օգնության հատկացումը: Այս մասին գրում է «Ալ-Շարք» պարբերականըմ հղում անելով շարժման բարձրաստիճան պաշտոնյայի:

Այդ նպատակով Անկարան Գազայում ներկայացուցչություն է բացելու, որը, պաշտոնական տեղեկության համաձայն զբաղվելու է «Գազայի վերականգնման և վերակառուցման նախագծերով»:

Շեշտվում է, որ ֆինանսական աջակցության մասին պայմանավորվածությունը ձեռք է բերվել ՀԱՄԱՍ-ի առաջնորդ Իսմայիլ Հանիյեի` Թուրքիա, վերջերս կատարած կատարած այցի ընթացքում: 

Իրանը կարող է հաջորդ շաբաթ դադարեցնել նավթի արտահանումը ԵՄ երկրներ

Իրանի իշխանություններ կարող են հաջորդ շաբաթ դադարեցնել նավթի արտահանումը Եվրամիության երկրներ, այս մասին է հայտնում ИТАР-ТАСС-ը` հղում անելով իրանական «Ֆարս» գործակալությանը, որն իր հերթին մեջբերում է երկրի Խորհրդարանի ազգային անվտանգության և արտաքին քաղաքականության հանձնաժողովի փոխնախագահ Հոսեյն Իբրահիմիին:

Վերջինիս խոսքով` պատգամավորները կիրակի կքննարկեն համապատասխան օրինագիծը, որն այս շաբաթ ներկայացվել էր «կրկնակի կարևորության» կնիքով, որին հավանությունն է տվել նաև Իրանի հոգևոր առաջնորդը:

«Ինչո՞ւ սպասել 6 ամիս, ինչո՞ւ չանել դա հենց հիմա: Իրականում Եվրոպան ոչ թե Իրանի, այլ հենց ինքն իր դեմ է պատժամիջոցներ սահմանում»,- Թեհրանի համալսարանում ուրբաթօրյա աղոթքից հետո հայտարարել է կրոնական գործիչ այաթոլլա Ահմադ Խաթամին:

«Նրանց (ԵՄ երկրներին) 6 ամիս է հարկավոր, որպեսզի գտնեն իրանական նավթը փոխարինող աղբյուրներ: Այլապես նավթի գները կտրուկ կաճեն: Իրանի համար նման պայմաններում գործելու լավագույն միջոցը այդ 6-ամսյա ժամկետի լրանալուց առաջ նավթի մատակարարումը դադարեցնելը կլինի»,- ավելի վաղ նույն խնդրի առնչությամբ հայտարարել էր Իրանի Հետախուզության նախկին նախարա Ալի Ֆալահյանը, ով ծագումով հայ է:

Եվրամիությանը բաժին է ընկնում իրանական նավթի 18 տոկոսը: Իրանի հիմնական նավթային գործընկերներն են Չինաստանը, Հարավային Կորեան, Ճապոնիան և Հնդկաստանը:

Ռուսաստանում առաջիկա տարիները նման կլինեն «անիծյալ 90-ականներին»

Ռուս քաղաքական գործիչ, «Ռոսնանո» ընկերությոն տնօրեն Անատոլի Չուբայսն ասել է, թե առաջիկա 5-7 տարին Ռուսաստանում իրավիճակը կնմանվի «մռայլ, ծանր, դրամատիկ, անիծյալ 90-ականներին»:

Россия 24 ալիքին տված հարցազրույցում նա ասել է, որ քաղաքականության մեջ կանխատեսում է լայնածավալ և միանքամայն ցավալի վերափոխումներ: 

«Մեր մոտ տնտեսական համակարգը, դժարություներով, բայց այնուամենայնիվ զարգանալով, վերջին 10-15 տարիների ընթացքում զուգորդվում է քաղաքական դեգրադացմամբ: Այդ դեգրադացիան այսօր դուրս է սպրդել և դրանից ստիպված ենք ձերբազատվել»,- նշում է Չուբաիսը:

Բոլոր այդ փոխակերպումների ընթացքում կայունության պահպանման վրա կարելի է հույս դնել միայն այնքանով, որքանով որ իշխանություններն ունակ կլինեն այդ ծավալի բարեփոխումեր իրականացնել` ավելացրել է Չուբաիսը:

Կարապետիչը ուզում է կոնկուրենցիա անել Արտաշատում

Տիգրան Կարապետյանը հավանաբար կառաջադրվի Արտաշատի մեծամասնական ընտրատարածքներից մեկում՝ ՀՀԿ նախընտրական շտաբի ղեկավար Հովիկ Աբրահամյանի եղբոր դեմ: Այդ մասին նա հայտնեց Tert.am-ի հետ զրույցում։ «Ուզում եմ կոնկուրենցիա անեմ այնտեղ, որտեղ միշտ չսիրվելով՝ ընտրվում են»,- ասաց «Ժողովրդական կուսակցության» (ԺԿ) նախագահը։ Ըստ վերջինիս՝ Արտաշատի վրա կանգ առնելու մյուս պատճառն այն է, որ մարզի հետ միշտ էլ կապեր է պահպանել: Տիգրան Կարապետյանը ներկայացրեց, թե ինչ հնարավոր կարգախոս կարող է ունենալ՝«Ընտրի՜ր ճիշտ ուղի, թե չէ կկործանվես»:

Կարապետյանից փորձեցինք ճշտել նաև, թե ճիշտ են մամուլի այն լուրերը, որ ՀՀԿ-ականներից մեկն իրեն առաջարկել է մտնել կուսակցության համամասնական ցուցակ, սակայն ինքը ՀՀԿ-ականին «ուղարկել է» ուր որ պետքն է: Հարցին ԺԿ նախագահը արձագանքեց իր հանրահայտ ծիծաղով (հը-հը-հը)։

Այսուհանդերձ, Տիգրան Կարապետյանը հաստատեց, որ եղել է նման դեպք, բայց ոչ ռեստորանում: Թե ով է այդ հանրապետականը, Տիգրան Կարապետյանը չի բացահայտում, քանի որ համարում է, որ դա «սիրուն բան չի», բայց ասաց, որ վերջինս բարձրաստիճան կուսակցական է եղել:

«Ինձ ամեն տեղից էլ առաջարկում են, բայց ես ոչ մի տեղ չեմ մտնում, քանի որ համարում եմ, որ իրենք անարդար են, իրենք պիղծ են, ու համագործակցել իրենց հետ, կնաշանակի՝ մեղսակից լինել»,- ասաց Տիգրան Կարապետյանը՝ կրկին նույն նկատառումով որևէ քաղաքական ուժի անուն չնշելով: Tert.am-ը խնդրել էր մանրամասնել՝ ԲՀԿ-ի՞ց, ՕԵԿ-ից, թե՞ այլ քաղաքական ուժից:

Տիգրան Կարապետյանն այս առնչությամբ ավելացրեց, որ իբրև հավատացյալ մարդ համարում է, որ դա գործարք կլիներ սատանայի հետ: Որպես քրիստոնյա նա ճանաչում է մեկ արժեք՝ «արդարություն և ճշմարտություն»:

Տիգրան Կարապետյանին ուղղված հրավերները ոչ միայն համամասնական ցուցակ մտնելուն են վերաբերում, որովհետև նա վերջին օրերին տարբեր միջոցառումներին մասնակցելու հրավերներ էլ ստանում: Բնականաբար, ասաց, որ բոլորին մերժում է:

«Մենակ Բանակի օրվան նվիրված տոնին կմասնակցեմ, քանի որ բանակը իմ համար սրբություն է»,- ասաց քաղաքական գործիչը:
ԺԿ-ն անպայման մասնակցելու է առաջիկա խորհրդարանական ընտրություններին և մասնակցելու է առանց քաղաքական դեմքերի:
Հիշեցնենք, որ ըստ երեկվա մամուլի՝ ՀՀ նախագահ Սերժ Սարգսյանը առաջիկայում հանդես է գալու կուսակցություններին ուղղված առաջարկով, որ ավելի շատ քաղաքական դեմքերի ներառեն իրենց համամասնական ցուցակներում:

Տիգրան Կարապետյանը այս ընտրություններին ապավինելու է ոչ թե նյութական կամ վարչական միջոցներին, այլ ժողովրդին: Նրա ընտրազանգվածը լինելու է դժգոհ, բայց հպարտ Հայաստանի քաղաքացին: ԺԿ նախագահի հավելմամբ՝ այդ քաղաքացին երբեք չի կարող «աբիժնիկ» լինել:

Շատերն են հիշում, թե ինչպես յուրաքանչյուր ընտրությունից հետո Տիգրան Կարապետյանը «ԱԼՄ»-ի եթերից ամոթանք էր տալիս իր «պոտենցիալ » ընտրողներին՝ «անաղուհացության» համար:

«Հա, էդ էլ կա»,- համաձայնեց ԺԿ նախագահը, ով համարում է, որ այդ ուրացությունը ոչ թե հայ ժողովրդից է, այլ նրա մեջ տարրալուծված նախկին «բոշեք»-ից:

Թուրքիայում աշխատելու իրավունքի հետ կապված ճգնաժամային վիճակ

Թուրքական «Հյուրիեթ» թերթն անդրադարձել է օտարերկրացիների` Թուրքիայում աշխատելու իրավունքի հետ կապված ճգնաժամային վիճակին` խոսելով մասնավորապես հայերի և վրացիների մասին:

Թերթը պատմում է, որ երկիրը լքում են «մեծ թվով» հայեր և վրացիներ, ներկայացնում նրանց դժգոհությունը, սակայն և հուսադրում է նոր տեղեկությամբ` այն մասին, թե Թուրքիայի աշխատանքի նախարարությունը բացառություն է անելու կոնկրետ ոլորտներում աշխատողների համար:

Ֆրանսիայի դեմ պատժամիջոցներ սահմանելու տեսական սպառնալիքներն առայժմ «օտարների», նախևառաջ հայերի դեմ փորձարկվող թուրքական իշխանությունների նոր օրենքը շրջանառության է մտնելու ս/թ փետվարի 1-ից:

«Հյուրիեթը» Թուրքիայում հայերի ու վրացիների զբաղվածության ոլորտներ է նշում տնային աշխատանքը, դայակությունը և հիվանդների խնամքը:

Թերթը ներկայացրել է նաև Ստամբուլի Աքսարայ շրջանի Էմնիյեթ ավտոկայանում տիրող իրարանցումը` նկարագրելով, թե մարդիկ ինչպես են շտապ լքում երկիրը` Թուրքիայում ապօրինի մնալու համար տուգանք վճարելուց խուսափելու համար:

Թերթը նաև մեջբերում է կոնկրետ քաղաքացիների: ՀՀ քաղաքացուհի Հայկանուշը, օրինակ, նկատում է. «Հացը հայրենիք չունի: Որտեղ հաց կա, էնտեղ էլ մենք` տնտեսապես խոցելի մարդիկս, գնում ենք: Մենք պիտի ապրենք ու ընտանիք պահենք: Այլ տարբերակ չունենք»:

«Հյուրիեթը» ներկայացնում է նաև «վիզափախի» (visa-run) մեխանիզմը, երբ Թուրքիայում աշխատող օտարերկրացիները մեկնում էին հարևան երկրներ իրենց 90-օրյա ժամկետի լրանալուց հետո, իսկ հետո անմիջապես հետ գալիս` նոր 90 օրանոց վիզայով: Իսկ այժմ Աշխատանքի և սոցապահովության նախարարությունը օտարերկրյա քաղաքացիներին թույլ է տալիս տուրիստական վիզայով երկրում մնալ միայն 3 ամիս, որի լրանալուց հետո նրանք ստիպված կլինեն սպասել ևս 3 ամիս նախքան կկարողանան վերադառնալ:

Պարբերականի փոխացմամբ` թուրքական իշխանությունները մի հարմարություն են ստեղծել ի նշան հայերի, ղրղըզների և գագաուզների հանդեպ երախտիքի: Խոսքը, սակայն, նշված ազգությունների այն ներկայացուցիչների մասին է, ովքեր հանդես են գալիս որպես տնային աշխատողներ և հիվանդապահներ:

Նրանց համար արվող բացառությունը կլինի այն, որ թույլ կտրվի առանց սահմանափակման աշխատել Թուրքիայում` հավելյալ վճարումների դիմաց: Հայերին և նշված մյուսներին չի կարող խոչընդոտել անգամ, եթե նույն աշխատանքի համար դիմեն Թուրքիայի քաղաքացիներ, գրում է թերթը` մեջբերելով Աշխատանքի և սոցապահովության նախարար Ֆարուկ Չելիքին:

Այն օտարերկրյա քաղաքացիները, ովքեր տուրիստական վիզայով եկել են Թուրքիա և ձեռք են բերել աշխատանքի թույլտվություն, կկարողանան Թուրքիայում իրենց կացության ժամկետը երկարաձգել մեկ տարով և ավելի ժամկետով, հայտնել է Չելիքը:

Սակայն այս դեպքում նրանք չեն կարող աշխատանքի հույս ունենալ այն սեկտորներում, որտեղ Թուրքիայի քաղաքացիները կցանկանան աշխատել:

Թերթը զուգահեռներ է անցկացրել նաև Թուրքիայում գտնվող ՀՀ քաղաքացիների թվի մասին տվյալների միջև` ըստ հայկական և թուրքական արտաքին քաղաքականության գերատեսչությունների տվյալների:

Այն դեպքում, երբ Էրդողանը Թուրքիայում ապրող հայերի թիվը սահմանել էր 170 հազար, ՀՀ ԱԳՆ-ն հայտարարել էր, թե այժմ Թուրքիայում ընդամենը 15 հազար ՀՀ քաղաքացի է բնակվում:

Իր անդրադարձը թերթը եզրափակում է վերոհիշյալ տիկին Հայկանուշին մեջբերելով. «Որպես հայեր` մենք միշտ հետ ուղարկվելու վախով ենք ապրել: Նման վերադարձը իմ ընտանիքի համար քաոս կնշանակի: Ես չեմ կարող ոչ սնունդ գտնել… ոչ աշխատանք»:

Քննարկվել են ՏԻՄ և ոստիկանակության փոխգործակցությանն առնչվող հարցեր

Երևանի քաղաքապետ Տարոն Մարգարյանի և ՀՀ Ոստիկանության պետ Վլադիմիր Գասպարյանի հետ համատեղ հրավիրված խորհրդակցության ժամանակ այսօր քննարկվել են տեղական ինքնակառավարման մարմինների (ՏԻՄ) և ոստիկանակության փոխգործակցությանն առնչվող հարցեր:

Ըստ քաղաքապետարանի տարածած հաղորդագրության` խորհրդակցությանը մասնակցել են Երևան քաղաքի վարչական շրջանների ղեկավարները, ՀՀ ոստիկանության Երևան քաղաքի վարչության և տարածքային բաժինների պետերը:

Տարոն Մարգարյանը կարևորել է համատեղ աշխատանքը հասարակական կարգի պահպանման գործում, որի արդյունավետությունը պայմանավորված է վարչական շրջանների և ոստիկանության բաժինների համակարգված աշխատանքով ու սերտ համագործակցությամբ:

Քաղաքապետն ընդգծել է, որ հասարակական կարգի պահպանման որակական բարելավումը հրամայական է և պահանջում է ամենօրյա ու հետևողական աշխատանք: Այս համատեքստում քաղաքապետն առանձնացրել է «Անվտանգ քաղաք» ծրագրի շրջանակում համագործակցությունը, որն ուղղված է քաղաքացու և քաղաքային միջավայրի հարմարավետության ու անվտանգության ապահովմանը, ինպես նաև համատեղ ծրագրերի իրականացումը հատկապես անչափահասների շրջանում:

Անդրադառնալով անվտանգ մայրաքաղաք ունենալու խնդրին՝ ՀՀ ոստիկանության պետ Վլադիմիր Գասպարյանը նշել է, որ հաջողության գրավականը ոչ միայն քաղաքային իշխանությունների հետ համագործակցության զարգացումն է, այլ նաև ուղղակի աշխատանքը համայնքներում, հասարակության տարբեր շերտերի ու ներկայացուցիչների հետ:

Ոստիկանապետը նաև նշել է, որ ընտրությունների շրջանում օբյեկտիվորեն հասարակական կյանքի որոշակի աշխուժացում է նկատվում, ինչը պարտավորեցնում է ավելի զգոն լինել և անել առավելագույնը այդ ժամանակահատվածում մայրաքաղաքում կայուն հասարակական կարգ ապահովելու համար:

Ոստիկանապետը համոզմունք է հայտնել, որ համակարգված ու առարկայական համագործակցությունը ցանկալի արդյունք կտա և հնարավորություն կտա իրականցնել օրինակելի մայրաքաղաք ունենալու ձգտումը:

ՀԱԿ 18 կուսակցություններն ընտրություններին կմասնակցեն մեկ դաշինքով

Այսօր Հայ Ազգային Կոնգրեսի քաղխորհրդի նիստից հետո հայտնի է դարձել, որ ՀԱԿ-ը առաջիկա խորհրդարանական ընտրություններին կմասնակցի մեկ միասնական դաշինքով:

Այս կապակցությամբ փորձեցինք ՀԱԿ համակարգող Լևոն Զուրաբյանից մեկնաբանություն ստանալ, թե մասնավորապես ինչ է քննարկվել այսօրվա նիստին: 

Սկզբում ՀԱԿ համակարգողն ասաց, որ մի քանի րոպեից կպատասխանի: Մի քանի րոպե անց էլ Լ. Զուրաբյանը, դուրս գալով աշխատասենյակից, ասաց, որ շտապում է, և չի կարող պատասխանել մեր հարցերին:

Սակայն Լևոն Զուրաբյանից այդպես էլ չկարողացանք որևէ տեղեկություն ստանալ:

Առա՛ջ, դեպի 1988

«Սարդարապատ» շարժման նախաձեռնող խմբի անդամ, կինոռեժիսոր Տիգրան Խզմալյանը Ֆեյսբուքի իր էջում առաջ է քաշում այլընտրանքային իշխանություն ստեղծելու՝ «Սարդարապատի» հայտնի թեզիսը՝ համեմատելով այդ իշխանությունը 1988-1990թթ. Հայաստանում ստեղծված ժողովրդի իշխանության հետ։ Ստորև ներկայացնում ենք գրառումն ամբողջությամբ.

Ժողովուրդը չի հավատում ընտրություններին, մինչդեռ բոլոր կուսակցությունները պատրաստվում են մասնակցել այդ բեմադրությանը: «Սարդարապատը» ոչ միայն չի գնալու այս կեղծ «ընտրություններին», այլ առաջարկում է անցնել ժողովրդական, այլընտրանքային իշխանության ստեղծմանը` ինչպես արվեց 1988-1990թթ.։

Հենց այդ այլընտրանքային, ժողովրդի վստահությունը վայելող իշխանության շնորհիվ մենք դիմացանք երկրաշարժին ու շրջափակմանը, հաղթեցինք պատերազմում: Այդ իշխանությունը իրականացնում էր ամբողջ մի խումբ, որը հաշվետու էր ազգին ու վերահսկվում էր ազգի կողմից:

Անձի պաշտամունքը սկսվեց հետո ու բերեց մեզ կործանման եզրին, բերեց ավտորիտարիզմ ու այսօրվա բռնապետությունը: Երիտասարդները դա կարող են չհիշել, բայց մեր սերունդը մի՞թե մոռացել է:

«Սարդարապատը» հիշեցնում է ու հորդորում ոչ թե բոյկոտել «չընտրությունները», թախտին նստած, այլ մեր իսկ պատմական փորձից ելնելով` իշխանազրկել կեղեքիչներին ու զավթիչներին, վերադարձնելով իշխանությունը ժողովրդին, ստեղծելով այլընտրանքային խորհրդարան ու կառավարություն: Առա՛ջ, դեպի 1988։ 

Օլիգարխով ու կրիմինալով արդեն հնարավոր չէ ընտրությունների գնալ

Հայ ազգային կոնգրեսի և ՀՀՇ անդամ Հովհաննես Իգիթյանը վստահ է, որ եթե հին մեթոդներով և եղանակներով անցկացվեն մայիսի 6-ի խորհրդարանական ընտրությունները, ապա չորս-հինգ տարի հետո «Հայաստանից բան չի մնա»: Ընդդիմադիր քաղաքական գործիչն այս մասին հայտարարեց «Բարգավաճ Հայաստանի» պատգամավոր Վարդան Բոստանջյանի հետ բանավեճի ժամանակ: 
Բանավեճի հիմնական հարցադրումը հետևյալն էր. «Քաղաքական ճգնաժամի արդյո՞ւնք է, որ կուսակցություններն ընտրություններին գնում են հին դեմքերով» և հին կազմով: 

Հովհաննես Իգիթյանը նշեց, որ խնդիրը ոչ թե հին դեմքերն են, այլ հին մեթոդները: 
«Այն ինչ հնարավոր էր «մարսել» 2008-ին, հիմա, երբ աշխարհը այս իրավիճակում է, նույն ձևով, նույն մարդկանցով… տերմինոլոգիան էլ չգիտեմ ոնց ասեմ՝ «օլիգա՞րխ», «կրիմինա՞լ» հնարավոր չէ ընտրությունների գնալ»,-ասաց Հովհաննես Իգիթյանը: Նրա ներկայացմամբ՝ այդ հին մեթոդներից մեկն այն է, որ քրեական տարրերին տրվում են «զոնալ գոտիներ»՝ ընտրակեղծիքներ իրականացնելու և այնտեղ վարչական ու նյութական միջոցներ ներդնելու համար: 
Հովհաննես Իգիթյանը վստահ է, որ իրավիճակի այս փոփոխությունը գիտակցում են նաև հանրապետականները և այդ իսկ պատճառով խուսափում են իրենց «դեմքերին« կուսակցության համամասնական ցուցակում ընդգրկելուց: Բայց, ասաց, որ խորամանկ քայլ են արել՝ քրեա-օլիգարխիկ-գործարար տարրերին թույլ տալով առաջադրվել մեծամասնական ընտրատարածքներում. կեղծիքների մասին ահազանգերի դեպքում ՀՀԿ-ն կարդարանա, թե նրանք ի՞նչ կապ ունեն կուսակցության հետ: 

Հովհաննես Իգիթյանը լրագրողներին խորհուրդ տվեց հանրապետականներից հարցնել, թե ինչու են նրանք իրենց պարտքը համարում հայտարարել, թե 50 տոկոսից ավել մասնակցություն են ունենալու ապագա խորհրդարանում: Բայց չէ՞ որ, այս մասին խոսում են նաև այլ քաղաքական ուժեր: Այս հարցին ի պատասխան, ընդդիմադիր քաղաքական գործիչն ասաց, որ մեկ բան է, երբ այդ մասին հայտարարում է ընդդիմությունը, մեկ այլ բան՝ իշխող կուսակցությունը: 
ԲՀԿ–ական Վարդան Բոստանջյանը հայտարարեց, որ ոչ ոք նման հայտարարություն անելու իրավունք չունի: «Որ ես հավաքելու եմ այսքան ձայն, ես՝ այնքան, որովհետև դրա պատասխանատվությունը ընկած է ընտրողների վրա»։
Հիշեցնենք, որ ԲՀԿ առաջնորդ Գագիկ Ծառուկյանը ոչ վաղ անցյալում հայտարարել էր, որ իր քաղաքական թիմը հաջորդ ԱԺ ընտրություններում 50+ տոկոս ձայներ է հավաքելու: 

Մի շարք երկրների առաջնորդներ ազգային հուզումների են պատրաստվում

Այս օրերին շվեյցարական Դավոս քաղաքում անցկացվող Համաշխարհային տնտեսական համաժողովի քննարկումների վերաբերյալ հոդված է հրապարակել հեղինակավոր The New York Times-ը: Հիշեցնենք, որ հունվարի 25-ից անցկացվող համաժողովում քաղաքական գործիչներն ու խոշոր գործարարները քննարկում են աշխարհում տնտեսական իրավիճակն ու պարտքային ճգնաժամից դուրս գալու ուղիները:

«Մոսկվայում և Կահիրեում ցուցարարները պահանջում են, որ իշխանությունը ներկայացուցչական լինի: Սակայն նման ուժով դժգոհություններ են նաև Մադրիդի ու Նյու Յորքի փողոցներում, ինչպես նաև` Աթենքում, քաղաք, որտեղ ծնվել է «ժողովրդավարություն» բառը», - գրել է վերլուծաբան Ջեք Յուինգը:

Նրա կարծիքով` այս բոլոր բողոքի ակցիաներից տպավորությունն այնպիսին է, որ մի շարք երկրների առաջնորդներ չեն արդարացնում բնակչության սպասումները, և «վերջիններիս օգնում են միավորվել սոցիալական ցանցերը` Facebook, twitter և այլն»: Այս փաստերը հուսադրող չեն դավոսյան համաժողովի մասնակից 40 պետությունների ու կառավարությունների ղեկավարների համար` սկսած Գերմանիայի կանցլերից մինչև Եթովպիայի վարչապետ»,- նշել է հոդվածագիրը:

«Ամերիկյան ու եվրոպական ժողովրդավարության գերազանցությունն արդեն այդքան ակնհայտ չէ, որքան տասը տարի առաջ էր»,- գրել է հոդվածագիրը: Ըստ նրա` նույնիսկ Դավոսի համաժողովի ղեկավար Կլաուս Շվաբն արտահայտվել է, որ «ներկայիս ձևաչափով կապիտալիզմն այլևս աշխարհի համար պետքական չէ»:

«Ժողովրդավարության ու տնտեսական աճի միջև կապը դադարել է անփոփոխ օրենք թվալ, եթե նայենք Չինաստանին և Վիետնամին»,- գրել է Յուինգը: Նրա կարծիքով` Չինաստանի ու Ռուսաստանի առաջնորդները նույնպես իրենց «հարմարավետ» չեն զգում, «նրանց վախեցնում է սոցցանցերի` գրաքննությանը հաղթելու ընդունակությունը»:

Միևնույն ժամանակ, ըստ նրա, ժողովրդավարության «փխրուն» լինելը տեսանելի է հատկապես Եվրոպայի կենտրոնում, օրինակ` Հունգարիայում:

«Եվրամիության անդամ որոշ երկրներում ազգայնականները փորձում են պարտքային ճգնաժամն օգտագործել քաղաքական նպատակներով»,- գրել է հոդվածագիրը: 

Դևիդ Քեմերոնը Դավոսում «վճռական քայլերի» կոչ է արել

Շվեյցարական Դավոսում անցկացվող Համաշխարհային տնտեսական 42-րդ համաժողովում աշխարհի քաղաքական առաջնորդներն ու խոշոր գործարարները քննարկում են Եվրոպայի պարտքային ճգնաժամից դուրս գալու ուղիները:

Մեծ Բրիտանիայի վարչապետ Դևիդ Քեմերոնն իր ելույթի ժամանակ Եվրամիության երկրներին այսօր կոչ է արել «վճռական քայլեր» ձեռնարկել` պարտքային ճգնաժամը հաղթահարելու ուղղությամբ: Նա ընդգծել է, որ «մանր- մունր» փոփոխությունները չեն լուծի խնդիրները:

Ըստ Քեմերոնի` անհրաժեշտ է ձեռնարկել այնպիսի միջոցառումներ, որոնք կնպաստեն զբաղվածության աճին և ԵՄ երկրներում աշխատանքի արդյունավետության բարձրացմանը, միևնույն ժամանակ դեմ է արտահայտվել բանկային գործառնություններ վրա հարկերի սահմանմանը:

Microsoft կորպորացիայի համահիմնադիր Բիլ Գեյթսն էլ նշել է, որ այսօր շատ խրթին տնտեսական իրավիճակ է ստեղծվել: «Սակայն դա չի կարող արդարացնել Երկիր մոլորակի աղքատ խավին հատկացվող օգնության կրճատումը»,- ասել է Գեյթսը:

Նա հայտարարել է, որ 750 մլն դոլար կփոխանցի Համաշխարհային հիմնադրամին` ուղղված ՁԻԱՀ-ի, տուբերկուլյոզի և մալարիայի դեմ պայքարին: Ըստ նրա` իր օգնությունն ազդանշան կդառնա այն բանի, որ այս կառույցը լիովին արժանի է այլ բարերարների վստահությանը:

Գեյթսը հիշեցրել է, որ հիմնադրամի գործունեությունն օգնել է մոտ 150 երկրների բազմաթիվ քաղաքացիների` հիվանդությունների կանխարգելման ու բուժման ծրագրի իրականացման շրջանակներում:

Համաշխարհային տնտեսական 42-րդ համաժողովը կտևի մինչև հունվարի 29-ը: Համաժողովի աշխատանքներին մասնակցում են մոտ 2.500 քաղաքական գործիչներ ու գործարարներ: 

Եվրամիությունը հետաքրքրված է Վրաստանի, Թուրքիայի և Բուլղարիայի միասնական էներգետիկ համակարգի ստեղծումով

Եվրամիությունը հետաքրքրված է համագործակցել Թբիլիսիի հետ` Վրաստանի, Թուրքիայի և Բուլղարիայի միասնական էնէրգետիկ համակարգ ստեղծելու նպատակով, հայտնում է apsny.ge-ն: Այդ մասին վրաց լրագրողներին Դավոսում հայտնել է էներգետիկայի եվրակոմիսար Գյունտեր Էտինգերը Վրաստանի վարչապետ Գիլաուրիի հետ հանդիպումից հետո:

Էտինգերի խոսքերով «էներգետիկան ԵվրոպաՅի և Վրաստանի համագործակցության հիմնական կողմերից է»: Եվ քանի որ Վրաստանը տարածաշրջանի ամենակարևոր տրանզիտային երկիրն է, ԵՄ-ն ցանկանում է համագործակցել Թբիլիսիի հետ` ստեղծելու միասնական էներգետիկ ցանց Վրաստանի, Թուրքիայի և Բուլղարիայի միջև, ինչը շահավետ կլինի բոլոր երկրներին:

Վրաստանի վարչապետը քննարկել է նաև ադրբեջանական գազը Վրաստանի սևծովյան ափ հասցնելու, այնտեղից էլ Ռումինիա և այլ եվրոպական երկրներ ուղարկելու մասին առաջարկը:

Նիդեռլանդների կառավարությունը փարաջան արգելելուն կողմ է քվեարկել

Նիդեռլանդների կառավարությունն այսօր կողմ է քվեարկել հասարակական վայրերում փարաջայի, կամ ինչպես այնտեղ են ասում` բուրկայի կրելն պաշտոնապես արգելելու մասին օրինագծին:

Ռուսական ИТАР-ТАСС լրատվական գործակալության հաղորդմամբ` արգելքը տարածվում է նաև ցանկացած այլ հագուստի կամ աքսեսուարների վրա, որոնք փակում են դեմքը, օրինակ` մոտոցիկլետի սաղավարտները:

Կառավարությունը վստահ է, որ փաստաթուղթն Ազգային Ժողովում բավարար աջակցություն կունենա և օրենքի ուժ կստանա:

Այդ ժամանակ Ֆրանսիայից և Բելգիայից հետո Նիդեռլանդները կդառնա եվրոպական երրորդ երկիրը, որն արգելում է փարաջան: 

Օրինախախտները, որոնք փարաջայով հասարակական վայրերում կերևան, ստիպված կլինեն 380 եվրո տուգանք կվճարել:

Արգելքը չի տարածվում այն մարդկանց վրա, ովքեր ազգային տոների ժամանակ դիմակներ կամ կառնավալային հանդերձներ են հագնում:

Նիդեռլանդներում ապրող փարաջա կրող կանանց ճշգրիտ թիվը հայտնի չէ, սակայն 16.7 մլն հոլանդացիներից մահմեդականներ են մոտ 1 մլն-ը:

Նորվեգիան ներողություն է խնդրել Հոլոքոստի համար

Այսօր` Հոլոքոստի զոհերի ոգեկոչման օրը, Նորվեգիայի վարչապետը ներողություն է խնդրել հրեաներից այն դերի համար, որ իր երկիրն ունեցել է Եվրոպայի հրեաների արտաքսման հարցում, տեղեկացնում է BBC-ին:

«Նորվեգացիները ձերբակալություններ են իրականացրել, նորվեգացիները բեռնատարներ են վարել, և դա պատահել է Նորվեգիայում», - ասել է վարչապետ Յենս Սթոլթենբերգն իր խոսքում:

Սա թերևս առաջին անգամ է, որ Նորվեգիայի առաջնորդը այսքան հստակ արտահայտվել է այս թեմայով:

Ժամանակին Նորվեգիայի 2100 հրեաների ավելի քան մեկ երրորդը մահվան ճամբարներ էր ուղարկվել, մնացածները փախել էին հարևան Շվեդիա, որը չեզոք էր մնացել Երկրորդ համաշխարհային պատերազմի ժամանակ:

Նորվեգիան Հոլոքոստին իր մասնակցությունն ընդունել էր 1998-ին և 60 մլն դոլար էր վճարել Նորվեգիայի հրեաներին, հրեական կազմակերպություններին` որպես բռնագրավված գույքի փոխհատուցում:

Գուրգեն Արսենյանը լինելու է ԲՀԿ համամասնական ցուցակի հինգերորդ համարը

ՄԱԿ նախագահ, Աժ նախկին պատգամավոր Գուրգեն Արսենյանը երեկ, ըստ էության, չի հերքել տեղեկությունն այն մասին, որ ինքը լինելու է ԲՀԿ համամասնական ցուցակի հինգերորդ համարը, և այդ ցուցակում ՄԱԿ որոշ անդամներ էլ են լինելու:

«Սպասեք ԲՀԿ-ի ցուցակի հրապարակմանը, կնայեք»,- ասել է Արսենյանը: Երբ մեր թղթակիցը պնդել Է, որ խոսքն իր անձին Է վերաբերում, Արսենյանը պատասխանել Է. «Սպասեք ՄԱԿ-ի համագումարին, որը կլինի փետրվարի 27-ից մինչև մարտի 2-ը, այդ ժամանակ Էլ մենք կհայտարարենք մեր բոլոր որոշումների մասին: Կգա օրը, հստակ կստանաք բոլոր պատասխանները: Երբ ասելու ժամանակը կգա, ես իմ ասելիքները ուղիղ կասեմ, նպատակներն Էլ, պատճառներն Էլ, թիրախներն Էլ»:

«Արսենյանն ասել Է նաև, որ ինքը մեծամասնական ընտրակարգով միանշանակ առաջադրվելու Է Երևանի 13 ընտրատարածքներից որևէ մեկում: Թե որում` չի նշել»:

Ոստիկանապետը աշխատասենյակներից մեկում տեսել է Ներսես Նազարյանի լուսանկարը և անկեղծորեն զարմացել

 ՀՀ ոստիկանապետ Վլադիմիր Գասպարյանը վերջերս շրջայցի է գնացել ոստիկանության քաղաքային վարչություն և ցանկացել է տեսնել, թե ինչ պայմաններում են աշխատում ոստիկանները: Սենյակից սենյակ անցնելով, նա օպեր-լիազորներից մեկի աշխատասենյակում տեսել է Ներսես Նազարյանի լուսանկարը և անկեղծորեն զարմացել. «Լավ, Ներսիկի նկարը կա, բա ո՞ւր ա «Կերամիկայի» Նորիկի նկարը»:

Ինչպես հայտնի է՝ Ներսիկ Նազարյանը համարվում է «Կերամիկա» և «Իդեալ» շինանյութի խանութների համասեփականատերը: Ոստիկանապետը զարմացել է, թե ինչու են ոստիկանության աշխատակիցներն իրենց պատին փակցնում այդ խանութների ցանցի մի համասեփականատիրոջ նկարը, բայց անտեսում են մյուսին:

Արթուր Թամրազյանը բացահայտ ցույց է տալիս իր կաշկանդվածությունը ԲՀԿ-ական մարզպետից

ՀՀ արդարադատության նախարար Հրայր Թովմասյանը գրեթե օր ու մեջ հայտարարում է, որ հայաստանյան դատական համակարգը վստահության խնդիր ունի:

«ժողովուրդ»-ը համաձայն է նախարարի հետ, քանի որ օրաթերթի դեմ Գեղարքունիքի մարզպետ Նվեր Պողոսյանի ներկայացրած հայցը քննող Գեղարքունիքի մարզի ընդհանուր իրավասության դատարանի դատավոր Արթուր Թամրազյանը բացահայտ ցույց է տալիս իր կաշկանդվածությունը ԲՀԿ-ական մարզպետից: Նա երեկվա դատական նիստի ընթացքում մերժել է «ժողովուրդ»-ի ներկայացուցչի գրեթե բոլոր միջնորդությունները:

«Զավեշտն այնտեղ է հասել, որ երբ միջնորդություն է ներկայացվել մարզպետին դատարան հրավիրելու կապակցությամբ, դատավորը, փոխանակ քննելու այն, մարզպետի փաստաբաններին հորդորել է գնալ և ճշտել՝ գործադիր իշխանության ներկայացուցիչ Պողոսյանը ցանկանո՞ւմ է դատարան գալ, թե՞ ոչ: Այսպես եթե շարունակվի, դատավորը կսկսի նիստեր հրավիրել՝ կախված մարզպետի տրամադրությունից: Մինչդեռ նրա գործառույթը միջնորդությունը բավարարելը կամ մերժելն է:

Ինչ վերաբերում է «Բարգավաճ Հայաստան» կուսակցությանը, որը հիշել է, որ պետք է պայքարել ժողովրդավարական արժեքների, իրավունքների ու ազատությունների համար, ապա կարծում ենք, որ պետք է իր քվոտայով նշանակված տեղական իշխանիկին հորդորի ներկայանալ դատարան և ապացուցել, որ կաշառակեր չէ:

Ինչո՞ւ է մարզպետը խուսափում «ժողովուրդ»-ի հետ դեմ առ դեմ հանդիպումից»,- հավելում է թերթը: 

Ծառուկյանը ոչ մի կերպ չի համաձայնվում ձայների այն քանակին, որն առաջարկում է Հանրապետականը

Երեկ ուշ երեկոյան մեզ հայտնի դարձավ, որ ընտրությունների հետ կապված որոշ մանրամասներ ճշտելու և պարզաբանումներ կատարելու համար հանդիպում է տեղի ունեցել կոալիցիոն երեք ուժերի ղեկավարների միջև:

Ուշագրավ է, որ այդ հանդիպման պատճառով, մեր աղբյուրների պնդմամբ, հետաձգվել է ՕԵԿ-ի երեկվա քաղխորհրդի նիստը, որը շատերի համար վճռորոշ էր լինելու: Հանրապետականը ցանկանում է հստակեցնել ընտրությունների ժամանակ ՕԵԿ-ի հետ աշխատելու մեխանիզմը: ՀՀԿ-ի և ԲՀԿ-ի թեման ավելի լուրջ է:

Ծառուկյանը ոչ մի կերպ չի համաձայնվում այն տարբերակին և ձայների այն քանակին, որն առաջարկում է Հանրապետականը:

Նահապետ Գևորգյա՞նն է նախագահի ընկերը, թե՞ ԲՀԿ-ական Ռուստամ Գասպարյանը

Արմավիր քաղաքն ու հարակից գյուղական համայնքներն ընդգրկող թիվ 21 ընտրատարածքում պատգամավորի թեկնածու են առաջադրվելու պատգամավորներ ՝ ՀՀԿ-ական Նահապետ Գևորգյանը և ԲՀԿ-ական Ռուստամ Գասպարյանը: Վերջինս երեկ թերթերից մեկում խոսելով այն մասին, որ առաջիկա խորհրդարանական ընտրություններում ՀՀԿ նախագահ Սերժ Սարգսյանը կարող է պաշտպանել իր կուսակից Նահապետ Գևորգյանին, ասել էր, որ ինքը նախագահի ավելի մոտ ընկերն է, ինքը և նախագահը մարտական ընկերներ են, ավելացնելով, որ մարտական ընկերները չեն դավաճանում:

Խոսելով այս թեմայի մասին, Աժ պատգամավոր Նահապետ Գևորգյանն ասել է. «Կարծում եմ, որ երկրի բարձրաստիճան պաշտոնյաների մասին նման հայտարարություններ անելը շատ ամոթ է, մանավանդ, որ դա չի համապատասխանում իրականությանը: Իսկ ինչ վերաբերում է նրան, որ ինքը նախագահի ընկերն է, առավել ևս մարտական ընկերը, ապա նման բաներ խոսելուց առաջ թող հիշի իր անցյալը և անցյալում կատարած քայլերը»:

Ռուստամ Գասպարյանը կարծիք էր հայտնել, որ ընտրություններում ինքը հաղթելու է: Ի պատասխան Գասպարյանի այս հայտարարությանը, Գևորգյանն ասել է.«Ջուրը չտեսած` պետք չէ բոբիկանալ»:

Գինգրիչը համոզված է, որ պաղեստինցիները «հորինված» մարդիկ են

ԱՄՆ Հանրապետկան կուսակցության ներկայացուցիչ Նյութ Գինգրիչը փորձել է պաշտպանվել այն բանից հետո, երբ կուսակցության նախագահական ընտրությունների բանավեճի ժամանակ նրան մեղադրել էին պաղեստինցիներին «հորինված» մարդիկ համարելու մեջ:

Associated Press-ը հաղորդում է, որ պաղեստինյան ծագում ունեցող անձը հարցրել էր Գինգրիչին, թե ինչպես նա կարող է ասել, որ պաղեստինցիները «հորինված են»:

Գինգրիչը, իր հայտարարությունը կրկնելով, ասել է, որ պաղեստինցիները իրականում իսկապես հորինվել են 1970 թվականին, քանի որ մինչ այդ նրանք պարզապես հայտնի էին որպես արաբներ:

Գինգրիչը նաև հստակեցնում է, որ Իսրայելի աջակիցն է: Նա ասում է, որ ԱՄՆ նախագահ Բարաք Օբաման բավական աջակցություն ցույց չի տվել Իսրայելին Պաղեստինի հետ հակամարտությունում:

«Ազատ դեմոկրատները» պատրաստ է նախագահական ընտրություններում սատարել Րաֆֆի Հովհաննիսյանին

Լավատեղյակ աղբյուրներից հայտնի է դարձել, որ «ժառանգություն»- «Ազատ դեմոկրատներ» կուսակցությունների բանակցություններում քննարկվող կարևորագույն հարցը վերաբերում է 2013 թվականի նախագահական ընտրություններին:

 «ժառանգությունը» պատրաստ է առաջիկա խորհրդարանական ընտրություններում «Ազատ դեմոկրատների» հետ նախընտրական դաշինք կազմել, եթե վերջիններս պարտավորվեն 2013 թվականի նախագահական ընտրություններում պաշտպանել Րաֆֆի Հովհաննիսյանի թեկնածությունը:

«Ազատ դեմոկրատները» պատրաստ են ընդունել այդ պայմանը, որովհետև համարում են, որ նախագահական ընտրություններում արժանի սեփական թեկնածու չունեն:

«Նման աջակցության դիմաց, սակայն, «Ազատ դեմոկրատները» ցանկանում են առավելագույն տեղեր ստանալ համատեղ համամասնական ցուցակի առաջին հնգյակում և առաջին տասնյակում: Երկու տեղ՝ առաջին և երեք տեղ երկրորդ հնգյակում: Բացի այդ, եթե առաջիկա ընտրություններում Աժ չեն անցնում, նախագահական ընտրություններում Րաֆֆիին սատարելու պայմանը ջրվում է»:

Բանզլադեշի Համիկը խաբեության զոհ դարձել

«Հրապարակ»-ը գրում է, որ օրեր առաջ ձերբակալված Բանզլադեշի Համիկը՝ Աշոտ Ավետիսյանը, պարզվում է, «Մալիբուի» մոտ կառուցվող շենքերից մեկում բնակարան է գնել և մեծ խումբ մարդկանց հետ միասին նույնպես խաբեության զոհ դարձել:

«Նրա բնակարանը կրկնակի վաճառվածների թվում է հայտնվել: Եվ մյուս սեփականատերը, ըստ մեզ հասած լուրերի, հայտնի գեներալներից մեկն է:

Արամի փողոցի վրա կիսակառույց շենքերի խաբված տնատերերի թվում շատ են բարձր պաշտոններ զբաղեցնող հայտնի անձինք: Մասնավորապես նրանց թվում են Խոսրով Հարությունյանը, Գագիկ Բեգլարյանը և այլք»:

Ոմանք զարմացած, ոմանք էլ հիացած են վարչապետ վարչապետի ու «ընդունակություններով»

«Ոմանք զարմացած, իսկ ոմանք էլ ուղղակի հիացած են վարչապետ Տիգրան Սարգսյանի «հմտություններով ու ընդունակություններով»»,- գրում է «Հրապարակ»-ը և հավելում.

«Այսքան կարճ ժամանակում՝ ընդամենը երեք տարում, կարողանալ հիմնովին ավերել երկրի տնտեսությունը և դա անել այնպես, որ ոչ մի լուրջ մեղադրանք չհնչի քո հասցեին:

Ավելին՝ քաղաքական հենարանի իսպառ բացակայության պարագայում այնպես ամրապնդել սեփական դիրքերը, որ բոլոր թշնամիներիդ հարցերը հիմնովին լուծես, իսկ նրանցից ոմանց անգամ «թոշակի» ուղարկես, դրա համար իսկապես մեծ խելք ու հմտություններ են պահանջվում»:

Նիկոյանը նորաստեղծ էթիկայի հանձնաժողովում առաջարկել է Քոչարյանի բարեկամուհուն

Մինչ հայրենի քաղաքական դաշտը պարբերաբար քննարկում Է ՀՀ երկրորդ նախագահ Ռոբերտ Քոչարյանի և Սերժ Սարգսյանի հնարավոր լարված հարաբերությունների թեման, ՀՀ Ազգային ժողովի նախագահ, Հանրապետական կուսակցության խորհրդի անդամ Սամվել Նիկոյանն այս առումով ցնցող քայլ Է արել:

Աժ նախագահը բարձրաստիճան պաշտոնյաների նորաստեղծ էթիկայի հանձնաժողովում առաջադրել Է Լիլիթ Պետրոսյանին,  նա Ռոբերտ Քոչարյանի կնոջ՝ Բելլա Քոչարյանի քրոջ դուստրն Է:

Լիլիթ Պետրոսյանը Քոչարյանի նախագահության տարիներին աշխատում Էր Հայաստանի Հանրապետության նախագահի նստավայրում:

24 իրաքցու սպանած ամերիկացի ծովայինը չի ենթարկվի ազատազրկման

Ամերիկացի միակ զինվորականը, ով մեղադրվում էր Իրաքի պատերազմի ժամանակ ավելի քան երկու տասնյակ անզեն մարդկանց սպանելու մեջ, երեքշաբթի օրը կարողացել է խուսափել ազատազրկումից այն բանից հետո, երբ հայտնել է, որ դա իր կողմից եղել է հարկավոր գործողության կատարում` որպեսզի «փրկի իր մյուս ծովայիններին»:

The Washington Post-ը գրում է, որ ԱՄՆ ծովային հետևակազորի հրամանատար Ֆրենկ Վուտերիչի դատապարտումով ավարտվում է 2005 թվականին սկսված դատական հետապնդումը: 2005 թվականին Հադիթ քաղաքում տեղի ունեցած սպանությունների մեջ մեղադրվել էին 8 ծովային, որոնցից մեկին արդարացրել էին, իսկ մյուս վեցի գործը կարճվել էր:

Վուտերիչն ընդունել է, որ հրամայել է «սկզբում կրակել, այնուհետև հարցեր տալ» այն բանից հետո, երբ փողոցային պայթյունի պատճառով մահացել էր նրա ընկեր զինվորականը: Սա բարկություն է առաջացրել Իրաքում, որտեղ պնդում են, որ ԱՄՆ-ն չի կրում իր ռազմական պատասխանատվությունը:

ՀՀԿ-ում տեղի է ունեցել որոշակի դերաբաշխում

 ՀՀԿ նախընտրական շտաբում տեղի է ունեցել որոշակի դերաբաշխում:

«Արտաքին հարաբերությունները՝ միջազգային դիտորդական առաքելությունների և դեսպանատների հետ աշխատանքը, կանոնակարգելու է ԱԺ պետաիրավական հարցերի հանձնաժողովի նախագահ Դավիթ Հարությունյանը: Մարզերի` համայնքապետերի հետ աշխատանքի կանոնակարգումը դրվել է փոխվարչապետ Արմեն Գևորգյանի վրա: Լրատվամիջոցների հետ աշխատանքի կանոնակարգումը, ինչպես 2007-ին, կկանոնակարգի ԱԺ փոխխոսնակ Էդուարդ Շարմազանովը:

Կրթական համակարգի հաստատությունների հետ աշխատանքի համակարգման գործը փորձում է ստանձնել կրթության նախարար Արմեն Աշոտյանը»,- ապա թերթը հավելում է.

«Սակայն, մեր տեղեկություններով, Աշոտյանին նախընտրական աշխատանքներում ակտիվորեն ներգրավելուն դեմ է ՀՀԿ նախընտրական շտաբի պետ Հովիկ Աբրահամյանը, որն Աշոտյանին համարում է վարչապետ Տիգրան Սարգսյանի թիմի ներկայացուցիչ:

Դեռևս հայտնի չէ, թե ով է զբաղվելու հասարակական կազմակերպությունների հետ տարվող աշխատանքով, որը 2007թ. դրված էր Մկրտիչ Մինասյանի վրա»:

Ռուսաստանի ընդդիմադիր առաջնորդին արգելում են մասնակցել նախագահական ընտրություններին

ՌԴ կենտրոնական ընտրական հանձնաժողովն այսօր հայտնել է, որ ընդդիմության առաջնորդին չի թույլատրվի մասնակցել մարտին կայանալիք նախագահական ընտրություններին:

Associated Press-ը հաղորդում է, որ ռուսական լրատվական գործակալությունների հաղորդմամբ՝ ԿԸՀ–ի քարտուղար Նիկոլայ Կոնկինն ասել է, որ հանձնաժողովն այս շաբաթ պաշտոնապես կարգելի Գրիգորի Յավլինսկուն մասնակցել ընտրություններին: Որոշումն ընդունվել է, քանի որ պարզվել է, որ նրա առաջադրվելու համար ներկայացված հարյուր հազարավոր ստորագրություններն իրականում կեղծ են եղել:

Յավլինսկին լիբերալ Yabloko կուսակցության առաջնորդն է և վարչապետ Վլադիմիր Պուտինի քննադատներից է: Պուտինը մարտի 4-ին կայանալիք ընտրություններում ձգտում է նորից ստանալ նախագահությունը:

Յավլինսկու թեկնածության մերժումն, ամենայն հավանականությամբ, ավելի կմեծացնի քաղաքական լարվածությունը երկրում, որը սկսվել էր խորհրդարանական ընտրություններում՝ խարդախությունների և անօրինությունների պատճառով:

Ճանապարհային ոստիկանության լուծարումը մի փոքր հետաձգվում է

Ոստիկանության նոր պարեկային ծառայություն ձեւավորելու ծրագիրը դեռ մշակման փուլում է: Այս մասին  տեղեկացրեց ՀՀ ոստիկանության հասարակայնության հետ կապերի վարչության պետ Աշոտ Ահարոնյանը: Նա մասնավորապես տեղեկացրեց, որ խոսքը որակական և գործառնական առումով նոր պարեկային ծառայության մասին է: Ա. Ահարոնյանի խոսքով` ծրագրի ավարտին նոր կպարզվի, թե որ ծառայությունները կմիավորվեն կամ կլուծարվեն:

«Ծառայությունների կրկնությունը կբացառվի, իսկ նոր պարեկային ծառայության մեջ կներգրավվեն ոստիկանության տարբեր ստորաբաժանումներ, հատկապես արտաքին ծառայություն իրականացնողները»,- ասաց Աշոտ Ահարոնյանը: Ըստ նրա, մասնավորապես, խոսքը ներկայիս պարեկապահակային ծառայության, ճանապարհային ոստիկանության, պահակային ծառայության մասին է:

Հիշեցնենք, որ նախկին ոստիկանապետ Ալիկ Սարգսյանը դեռեւս անցած տարվա ամռանը լրագրողներին ասել է, որ ճանապարհային ոստիկանությունը մինչեւ 2011-ի ավարտը լուծարվելու և ընդգրկվելու է նոր պարեկային ծառայության կազմում: