ՀՀ նախագահի թեկնածու, «Ժառանգություն» կուսակցության նախագահ Րաֆֆի Հովհաննիսյանը քիչ առաջ լրագրողների հետ հանդիպմանը նշեց, որ այսօր ընտրությունների օրը հայ ժողովուրդը հաղթանակել է:
«Բոլորս գիտենք, որ հաղթանակի մեջ ենք: Ես հարգում եմ բոլոր մրցակիցներին ու առաջին հերթին Սերժ Սարգսյանին՝ այն ավանդը, որ նա ունեցել է պատերազմում ու պետականաշինության մեջ: Բայց հենց ինքն է, որ 20 տարվա մեջ առաջին անգամ, այսօր պետք է ընդունի, որ ժողովուրդը հաղթել է: Ոչ թե Րաֆֆին հաղթել ու Սերժը պարտվել, այլ հայ ժողովուրդը ազգ է դարձել»,- ասաց նա:
Րաֆֆի Հովհաննիսյանը ընդգծեց, որ Հայաստանի քաղաքացին այսօր խոսել է ու շատ հստակ է խոսում է բոլոր մարզերում և ասում է, որ սա մեր երկիրն է, մեր հայրենիքն է:
«Հենց Սերժ Սարգսյանն է այն մարդը, որ կարող է ընդունել, որ Հայաստանը արժանի է դե յուրե նախագահության: Ես այլևս հորդորով հանդես չեմ գա, ժողովուրդը խոսել է ու քվեարկել է: Ասում եմ գեներալ, հրամանատար, մարզպետ քաղաքապետ լինի, ով խեղում է հայ ժողովրդի ու քաղաքացու ձայնը պատասխան է տալու: Ինձ համար բնավ կարևոր չէ ինչ կուսակցության է, բոլորը պատասխան են տալու, ով սպառնա հայ ժողովրդին, լինի հերոս է թե շարքային»,-ասաց նա և ավելացրեց, որ իրեն անհրաժեշտ է ընդամենը հինգ տարի:
Րաֆֆի Հովհաննիսյանը չցանկացավ պատասխանել որևէ հարցին, այլ ասաց որ բոլոր հարցերին կպատասխանի վաղը Ազատության Հրապարակում ժամը 17-ին:
No comments:
Post a Comment