Չնայած Իրանի նոր նախագահ Հասան Ռոհանիի խոստումներին, թե կանանց քաղաքացիական իրավունքները կբարելավվեն իր կառավարման օրոք, Քազվին քաղաքի խորհրդի կին անդամին թույլ չեն տվել զբաղեցնել պաշտոնը՝ «սեքսուալ» լինելու պատճառով, գրում է «Ալ-Արաբիան»՝ հղում անելով բրիտանական The Times-ում տեղ գտած հոդվածին:
Նինա Սիախալի Մորադիին քաղաքային խորհրդում թույլ չի տրվել անցնել պաշտոնի, քանի որ նրա ընտրությունը չեղյալ է հայտարարվել կրոնական պահպանողականների կողմից:
Հունիսին անցկացված ընտրությունների ժամանակ, անգամ ստանալով 10.000 ձայնից ավելի և 163 թեկնածուներից զբաղեցնելով 14-րդ տեղը, ինչը նրան ապահովում էր քաղաքային խորհրդի անդամի պաշտոնը, 27-ամյա ինժեներ և վեբ-կայքի դիզայներ Մորադին ստիպված է եղել շատ շուտ ավարտել իր քաղաքական կարիերան, որովհետև համարվել է «չափազանց գրավիչ» պաշտոնը զբաղեցնելու համար:
«Մենք նորաձևության պոդիումի մոդել չենք ցանկանում խորհրդում»,- ասել է Քազվինի բարձրաստիճան պաշտոնյաներից մեկը:
Մորադիի կարգախոսն էր՝ «Երիտասարդ գաղափարներ երիտասարդ ապագայի համար»։ Նա կողմ էր Քազվինում կանանց ավելի լավ իրավունքներին, հին քաղաքի վերականգնմանը և քաղաքի նախագծերում երիտասարդության ավելի մեծ ներգրավվածությանը: Նրա լիբերալ հայացքները շատ սատարողներ է գտել բնակչության շրջանում:
No comments:
Post a Comment