Բելառուսի նախագահ Ալեքսանդր Լուկաշենկոն չի բացառել Մաքսային միությունում, ինչպես նաև՝ նոր ձևավորվող Միասնական տնտեսական միությունում այսպես կոչված՝ չճանաչված կամ մասնակի ճանաչված պետական կազմավորումներին հատուկ կարգավիճակ տալու հնարավորությունը:
Ի պատասխան «ԱրմԻնֆո» գործակալության թղթակցի հարցի՝ այս մասին նա հայտարարել է հոկտեմբերի 21-ին՝ ԱՊՀ անդամ-երկրների ԶԼՄ-ների ներկայացուցիչների հետ հանդիպմանը:
Բելառուսական պետության ղեկավարն ընդգծել է, որ նման գաղափար չի քննարկվել, և ինքը դեռ պատրաստ չէ որևէ պատասխան տալ:
«Բայց դա թեմա է, որը կարող է քննարկվել»,-նշել է Լուկաշենկոն՝ համաձայնելով այն կարծիքին, որ այդ չճանաչված կազմավորումների (Ղարաբաղ, Մերձդնեստր, Աբխազիա, Հարավային Օսիա) տնտեսություններն ամբողջովին ինտեգրված են Մաքսային միությանը, ինչպես նաև՝ այն երկրների տնտեսություններին, որոնք մտադիր են միանալ ՄՄ-ին:
Լուկաշենկոն համաձայնել է նաև, որ այդ կազմավորումների նկատմամբ տնտեսական արգելքներ դնելը ճիշտ չէր լինի, հատկապես՝ եթե հաշվի առնենք նրանց պատմությունների ողբերգական պահերը:
Անդրադառնալով ղարաբաղյան հակամարտությանը՝ Ալեքսանդր Լուկաշենկոն նշել է, որ կարգավորումն ամբողջովին կախված է Հայաստանի և Ադրբեջանի նախագահներից:
«Նրանք պետք է նստեն և վերջնականապես պայմանավորվեն ու որքան հնարավոր է՝ արագ լուծեն այդ պրոբլեմը»,-նշել է Բելառուսի նախագահը: Նա ընդգծել է, որ լավ հարաբերություններ է պահպանում ինչպես Հայաստանի ներկայիս նախագահ Սերժ Սարգսյանի, այնպես էլ՝ երկրորդ նախագահ Ռոբերտ Քոչարյանի հետ:
No comments:
Post a Comment